“Barselona” – “Vilyarreal” oyunu Mayamidə keçirilməyəcək
22.10.2025 , 10:35
İspaniya La Liqasının dekabr ayında oynanılması planlaşdırılan “Vilyarreal” – “Barselona” qarşılaşması ABŞ-da baş tutmayacaq.
Korner.az xəbər verir ki, La Liqa rəhbərliyi İspaniyada yaranan mənfi ictimai reaksiyaya görə matçın Mayamidə təşkilindən imtina edib.
Qərarın ardından “Barselona” rəsmi açıqlama yayıb. Klub qərara hörmətlə yanaşdığını bildirib:
“Barselona”, “Vilyarreal”la oyunun Mayamidə keçirilməməsi ilə bağlı qərarı qəbul edir və hörmətlə qarşılayır. Həmçinin, klub daha əvvəl oyunun ABŞ-da oynanılması barədə qərarı da eyni şəkildə hörmətlə qəbul etmişdi.”
Kataloniya təmsilçisi əlavə edib ki, La Liqanın beynəlxalq arenada imicinin gücləndirilməsi baxımından bu fürsətin əldən getməsi təəssüf doğurur:
“Təəssüf ki, ABŞ-dakı azarkeşlər komandamızı canlı izləmək imkanından məhrum oldular.”
Xatırladaq ki, “Real Madrid” və bir neçə digər La Liqa klubu matçın ABŞ-da keçirilməsinə qarşı çıxmışdı.
