Sabah Avropa Liqasının birinci təsnifat mərhələsində "Mura" ilə qarşılaşacaq "Bakı"nın baş məşqçisi Novruz Əzimov bu gün mətbuat konfransı keçirib. Korner.az-ın məlumatına görə, paytaxt təmsilçisinin baş məqşçisi "Mura"nın Bakıya gec gəlməsinə belə münasibət bildirib:
"Komandanı 80 % oyuna hazır saymaq olar. Təlim-məşq toplanışını da yaxşı keçmişik. Psixoloji durum da yaxşı vəziyyətdədi.
"Mura"nın Bakıya oyun günü gəlməsini üstünlük hesab etmirəm. Vaxtilə biz səfərə iki gün keçikmişdi. Amma gedib oyunu heç-heçə oynadıq. Yəni "Mura" yorğun olsa da, öz güclərini qoyacaqlar. Belə oyunlarda rəqibin yorğunluğu o qədər də əhəmiyyət daşımır.
"Bakı"da isə vəziyyət yaxşıdı. Sadəcə hücumçu problemimiz var. Onu da Nurlan Novruzovla aradan qaldırmaq istəyirik. Çoxları deyir ki, o, təcrübəsizdi və bu işin altından qalxa bilməz. Amma mən komandanın hər bir üzvünə inanıram. O məşqlərdə də özünü yaxşı tərəfdən göstərir. Bundan əlavə başa çatan çempionat oyunlarında da vurduğu qollarla özünü sübut etdi. Parks isə zədəli olduğuna görə, tam formada deyil. Amma ona bir hissə şans verə bilərəm".
