Azərbaycan Premyer Liqası III turu çərçivəsində səfərdə "Rəvan"ın qonağı olacaq "Bakı" klubu bu oyunun hazırlıqlarına start verib.
Korner.az-ın klubun rəsmi saytına istinadən verdiyi məlumata görə, komanda bu oyuna hazırlıqları gündə 2 məşqlə davam etdirir.
Klubun təlim-məşq bazasının təbii örtüklü meydanında məşqə çıxan komandanın heyətində milli komandalara dəvət alan futbolçuların yoxluğu diqqət çəkir. Qeyd etmək yerinə düşər ki, Maris Verpakovskis və Denis İvanovs Latviya , Qiorqi Popxadze Gürcüstan, Rəhman Hacıyev Azərbaycan U-21 və Namik Ələsgərov Azərbaycan U-19 milli komandalarının düşərgəsinə yollanıblar.
Eyni zamanda hərbi xidmətə yollanan futbolçular Elvin Məmmədov, Novruz Məmmədov və Aqil Məmmədov 1 aylıq fasilədən sonra ilk dəfə komandanın məşqlərinə qatılıblar. Baş məşqçi Bojidar Bandoviçin rəhbərliyi altında bir araya gələn futbolçular təxminən 90 dəqiqə ərzində texniki təmrinlər üzərində çalışıblar.
Yüngül qızınma hərəkətləri ilə başlayan məşq ardından ikitərəfli oyunla davam etdirilib. Əlavə edək ki, "Bakı" ölkə çempionatında növbəti oyununa avqustun 18-də çıxacaq. "Rəvan"la oyun "Dalğa Arena" stadionunda baş tutacaq.
