İndiyə qədər bu iki komanda ölkə çempionatında 25 oyun keçirib. Tərəflərin hərəsi 7 dəfə meydandan qalib ayrıldığı halda, ən çox qeydə alınan nəticə heç-heçə olub. “Xəzər Lənkəran” və “Bakı” 11 çempionat oyununda meydandan sülhlə ayrılıb. Vurulan qollarda isə komandamızın üstünlüyü var – 26:22.
Statistika “Bakı” ilə səfər oyunlarının “Xəzər” üçün çətin keçdiyini göstərir. Çempionat çərçivəsində bu rəqibin meydanında baş tutan 12 oyunda komandamız 7 dəfə heç-heçə edib, 4 dəfə məğlub və yalnız bir dəfə qələbə qazanıb.
“Xəzər Lənkəran” və “Bakı”nın hazırkı mövsümdə son matçlarının statistikasında bir çox oxşarlıqlar var. Belə ki, hər iki komanda Premyer Liqanın son 5 turunda bir qələbə qazanıb, iki heç-heçə edib və iki dəfə məğlub olub.
Komandamız da, paytaxt klubu da bu turlar ərzində yeganə qələbəni “Simurq” üzərində qazanıb. Bundan əlavə, bu həftə üz-üzə gələcək rəqiblər ötən beş matç ərzində yalnız bir dəfə qolsuz heç-heçə etməklə qapısını toxunulmaz saxlayıb.
Geridə qalan turlar ərzində 7 dəfə qapısından 2 və daha çox qol görən “Bakı” digər tərəfdən çempionatda vurduğu qolların sayına görə yalnız “Qarabağ”dan geri qalır – 22.
Komandaların bu mövsüm 6-cı turda Lənkəranda baş tutan qarşılaşması “Xəzər Lənkəran”ın Premyer Liqada ilk qələbəsi, klub tarixində 400-cü çempionat qolu, Mbilla Etamenin ilk qolu və dublu ilə yadda qalmışdı.
