Bakıda keçirilən 42-ci Ümumdünya Şahmat Olimpiadasının sonuncu turunda media nümayəndələrinin mükafatlandırılma mərasimi keçirilib.
Korner.az-ın məlumatına görə, tədbiri giriş sözü ilə Bakı Şahmat Olimpiadasının mətbuat xidmətinin rəhbəri Sənan Şəfizadə açıb. O, ölkəmizdə təşkil olunan mötəbər yarışa KİV tərəfindən böyük maraq olduğunu bildirib.
Şəfizadə qeyd edib ki, yarışın “Facebook” səhifəsinin 20 mindən artıq üzvü var: “Hər gün rəsmi səhifəni 200 mindən çox adam ziyarət edir. 8-ci turdan sonra açıqlanan rəqəmlərə görə canlı yayımı 4 milyondan çox insan izləyib. Olimpiada çərçivəsində 61 mətbuat konfransı təşkil olunub. Konfranslar zamanı yerli mətbuat orqanları daha fəal çalışıblar. Bu səbəbdən də digər olimpiadalardan fərqli olaraq Bakıda ilk dəfə mətbuat işçilərinin əməyi qiymətləndirmək qərarına gəldik. Hər birinizə Bakı Şahmat Olimpiadasına göstərdiyiniz dəstəyə görə təşəkkür edirik”.
Ardınca Şəfizadə yarışları yüksək dəqiqlik və operativliklə işıqlandıran media nümayəndələrini mükafatlandırıb. Jurnalistlərə təşəkkürnamə və xatirə hədiyyələri təqdim olunub.
