İyunun 7-də 15 yaşadək futbolçular arasında keçirilmiş Azərbaycan çempionatının final matçından sonra baş verən xoşagəlməz olaylarla əlaqədar İdman Araşdırmalar Mərkəzi (İAM) bəyanat yayıb.
Korner.az-ın qhtxeber.az-a istinadla verdiyi məlumata görə, bəyanatda “Neftçi”nin 1:0 hesabı ilə qalib gəldiyi görüşün ardından meydançaya tamaşaçıların daxil olması, iki komandanın futbolçuları və tərəfdarları arasında kütləvi toqquşmaların yaşanması xatırlanıb.
İnsidentdə “Bakı” və “Neftçi” rəsmilərinin də iştirak etmələrindən təəssüflənən İAM onların azyaşlıları sakitləşdirmək əvəzinə bir-biri ilə əlbəyaxa olaraq, mənfi nümunə olduqları vurğulanıb. Digər tərəfdən, insidentin 22 sentyabr – 13 oktyabrda Azərbaycanda təşkil olunacaq FİFA U-17 Qadınlararası Dünya Çempionatının keçiriləcəyi stadionlardan biri – “Dalğa Arena”da baş verdiyi və bu stadionda təhlükəsizliyin lazımi səviyyədə qorunmadığı qeyd edilib. Həm də insidentin Azərbaycanın da namizədliyini irəli sürdüyü 2020-ci il Avropa çempionatında iştirak etmə şansları olan futbolçular arasında yaşandığı diqqətə çatdırılıb.
İAM hesab edir ki, FİFA U-17 Qadınlararası Dünya Çempionatı kimi nüfuzlu yarışa ev sahibliyi edəcək stadionda və digər arenalarda təhlükəsizliyin qorunmasına nəzarət artırılmalı, klublarda yetişən futbolçuların təkcə oyunlarına deyil, kollektivdə nümunəvi və sağlam mühitdə yetişmələrinə şərait yaradılmalı, insidentin səbəbkarları və onun böyüməsinin təşəbbüskarları layiqli cəzalarını almalıdırlar.
