“Xəzər Lənkəran”ın baş məşqçisi Karles Bakeslə yollarını ayırdığını bildirmişdik. İspaniyalı çalışdırıcı istefasıyla bağlı klubun saytına açıqlama verib.
Korner.az-ın məlumatına görə, ispan çalışdırıcısı istefasının səbəblərini belə açıqlayıb:
“Mən buraya komandanın dinamikasını artırmaq üçün gəlmişdim. Ancaq gəlişimlə komandanın çıxışları uğursuz alınmağa başladı. Məhz buna görə “Qəbələ” ilə oyundan sonra mən rəhbərliyə istefaya getməyim haqqında təklif verdim ki, komandanı irəli apara biləcək başqa namizədlərə yol açım. Düşünürəm ki, indi mənim gedişim üçün ən yaxşı vaxtdı. Ola bilsin ki, mənim məhz indi getməyim komandaya uğur gətirsin”.
Məşqçinin sözlərinə görə, qış fasiləsinə qədər “Xəzər Lənkəran”ın heyəti kasad idi və o, həmin fasilə ərzində komandanın güclənəcəyinə ümid bəsləyirdi. Lakin “Xəzər Lənkəran”ın son çıxışları onu istefaya getməyə vadar edib: “Düşünürəm ki, “Xəzər Lənkəran”da qazandığım təcrübə mənim üçün gələcək kariyeramda faydalı olacaq.
Məndən sonra gələcək məşqçiyə mən heç bir məsləhət vermək istəmirəm. Ancaq ümid edirəm ki, o, kifayət qədər təcrübəli və komandanı irəli apara biləcək gücdə bir mütəxəssis olacaq. Hazırda burada qalan Erik və Emin komandanı daha yaxşı tanıyırlar. Odu ki, onlar komandaya növbəti görüşlərdə uğur qazandırmağa qadirdilər”.
Bakes azarkeşləri də unutmayaraq klub rəhbərliyinə yaradılan şəraitə görə təşəkkürünü bildirib: “Mən komandalarını çox sevən Lənkəran azarkeşlərini heç vaxt unutmayacağam. Onlar mənə hər zaman dəstək olublar. Eyni zamanda, klub rəhbərliyinə öz dərin minnətdarlığımı bildirirəm. Onlar komandaya xüsusi qayğı göstərərək, səmərəli iş üçün lazımi şəraiti yaratmışdılar. Deyə bilərəm ki, mən artıq yaşıl rəngi çox sevirəm”.
