Avropa Çempionatı-2016-nın seçmə mərhələsi çərçivəsində Bakıda keçirilən Azərbaycan-Bolqarıstan matçı zamanı “Bakcell Arena”nın qazonun bərbad durumu diqqətimizdən qaçmadı. Halbuki, ot örtüyünü ideal vəziyyətə gətirmək üçün hətta “Neftçi” buradan “Tofiq İsmayılov”a “sürgün” edilmişdi. Bu bir yana, oyundan öncə hər iki ölkənin himni səsləndirilərkən Azərbaycan himninin bəzi hissələri əcaib şəkildə kəsilməsi də biabırçı mənzərə idi. Bizi maraqlandıran bu kimi suallara cavab almaq üçün arenanın baş direktoru Tələt Məmmədovla əlaqə saxladıq.
Tələt bəy əvvəlcə müsahibəyə razılıq versə də, sonra yadına nə düşdüsə, “səsimi diktofona yazacaqsan?” – sualını verdi. “Hə” cavabını eşidincə sualların məzmunu ilə bağlı soruşdu. Ona hansı mövzuda danışacağımızın ucundan-qulağından deməyə macal tapmamışdım ki, bir də gördüm, Tələt bəy minib “cinin atı”na, sağa-sola çapır. Nə illah etdimsə, dedi, kəs başımı, müsahibə vermərəm: “Mən danışa bilmərəm, baxın, orda AFFA-nın baş katibi Elxan Məmmədov durub. Məgər oyundan sonra müsahibə verməyib? Nə sualınız varsa, ona müraciət edin. Bu məsələlər mənlik deyil. Bitdi”.
İndi ora-bura, dost-tanışa söz salmışıq, elçi göndərmişik, “Bakcell Arena”nın xadimələrinin, işıqçılarının telefon nömrələrini axtarırıq. Bəlkə direktorlarında axtarıb tapmadığımız cəsarəti onlarda tapdıq, qazonun niyə hər rüb, hər ay dəyişdirildiyini bildilər, danışdılar. Onları tapıb danışdırmaq “Elxan Məmmədov zirvəsi”ni fəth etməkdən qat-qat asan olar, hər halda.
Ürfan Məmmədzadə
