Azərbaycan millisi DÇ – 2018-in seçmə mərhələsində sabah Çexiya yığmasını qəbul edəcək. Komandamızın baş məşqçisi Robert Prosineçki bu gün keçirilən ənənəvi oyunöncəsi mətbuat konfransında jurnalistləırin suallarını cavablandırdı.
O, əvvəlcə matç barədə fikirlərini bildirdi:
– Seçmə mərhələdə son ev oyunumuzdu. Bizi çətin rəqib gözləyir. Lazımi qədər Çexiyanı analiz etmişik. Son matçlarda məğlub olsalar da, bu, zəif olduqları demək deyil. Komandanın futbolçularının topla davranışı çox yaxşıdı. Hədəfimiz son ev oyunumuzda yaxşı oyun və uğurlu nəticə göstərməkdi.
– Lehimizə penalti verilsə, Rəşada qol vurmaq üçün şərait yaradacaqsızmı?
– 3 ildi artıq Azərbaycandayam. Rəşad ilk gündən millinin vacib oyunçusu olub. 100-cü matçına da bu ərəfədə çıxıb. Əgər penalti olsa, daha yaxşı olardı ki, Rəşad vurmasın. Buna imkan verməyəcəm. Bəlkə alınmadı, top qapıdan keçmədi…
– Müdafiənin mərkəzi deyiləndə ağıla gələn ilk ad Rəşad Sadıqovdu. Ondan sonra millidə davamçı kimi görürsüz?
– Futbolçu həyatı belədi. Hər şeyin bir sonu var. Rəşadın fikrincə, artıq getmək vaxtıdı. O, Azərbaycan futbolunun görkəmli adlardan biridi. Ölkə futbolu üçün xidməti çoxdu. Alternativlə bağlı suala indi cavab verə bilmərəm. Gələcəkdə bu barədə danışacağıq. Ancaq indi yalnız sabahkı matçı fikirləşirik.
– Komandada vəziyyət necədi. Zədəli problemi var…
– Çalışdıq ki, yaxşı hazırlaşaq. İki zədəli futbolçumuz var. Maksim Medvedev sıradan çıxdı və Araz Abdullayev də klubdan zədəli qayıdıb. Onlar hər iki oyunu buraxacaqlar.(FutbolPress)
