Gündəmə baş məşqçi dəyişiklikləri ilə gələn "Rəvan"da bu artıq adət-ənənə halını alıb. Cevat Gülerin istefasından sonra komandaya yenidən baş məşqçi təyin edilən Bəhmən Həsənov da çox duruş gətirmədi. Artıq "Rəvan" əvvəllər də bu komanda da çalışan bosniyalı Kamal Alispahiçə tapşırılıb.
Məhz bu səbəbdən Bəhmən Həsənovla əlaqə saxladıq. Çalışdırıcı Korner.az-a verdiyi müsahibədə qaranlıq məqamlara aydınlıq gətirib.
– Atıq neçənci dəfədi ki, “Rəvan”da baş məşqçi təyin olunur, ardından istefaya göndərilirsiz…
Bilirsiz, hər şey siz fikirləşdiyiniz kimi deyil. Qarşıdakı günlərdə mən kurslara gedəcəm. Bu 10 gündə də komandanı başsız buraxmaq düzgün deyil. “Rəvan” çempionluğa oynayır və komanda qarşısına qoyulan vəzifəni maksimum yerinə yetirmək üçün bu yollara əl atır.
– “Rəvan”da baş məşqçi dəyişiklikləri bu sxemlə davam edir. Bəhmən Həsənov – Vladislav Qədirov, Bəhmən Həsənov – Cevat Gülər, Bəhmən Həsənov – Kamal Alispahiç. Nə baş verdiyini izah edə bilərsiz?
“Rəvan”ın iddiaları, məqsədləri var və buna uyğun hərəkət edirik. Alispahiç heç də pis məşqçi deyil. Komandaya uğur qazandıra biləcək məşqçidi. Mənim özümə gəlincə isə özümü tam olaraq “Rəvan”a baş məşqçi görmürəm. Bəzi öyrənməli olduğum şeylər var.
– Özünüzü hazır saymırdızsa, niyə razılaşırdız komandaya baş məşqçi təyin olunanda?
Klubu pis vəziyyətdə qoymamaq üçün. 5 dəqiqənin içində hardan baş məşqçi tapmaq olardı ki? Bu komandaya məndən yaxşı bələd olan yoxdu.
– Belə çıxır ki, “Rəvan” Bəhmən Həsənovla "oyun" oynayır?
Yox. Mən bu klubun işçisiyəm. Siz bizim klubun içində olsaydız, heyran qalardız. Bura mənim doğma evimdi. Buna "oyun" oynamaq deməzdim. Biz hamımız “Rəvan”ın uğurunu istəyirik və buna görə də addımlar atılır. Mən yenə “Rəvan”dayam və buranın işçisiyəm. Kurslara qatılanda istər-istəməz komanda başsız qalır. Bu keçən il də belə olmuşdu.
– Dəfələrlə baş məşqçi təyin olunub, sonradan ehtiyata göndərilmək necə hissdi?
Bura layiq olmasam, məni çıxardardılar və bir daha da geri götürməzdilər. Sadəcə mənim öyrənməyə ehtiyacım var. Özümü normal məşqçi sayıram, ancaq kurslara, seminarlara ehtiyacım var.
– Düşünmürsüz ki, klub sizi “sındırır”? Yalnız kimsə istefaya göndəriləndə sizi müvəqqəti təyin edib sonra yenə "ehtiyat"a göndərir…
Belə deyil. Mən yaxşı nəticə göstərə bilsəydim, təbii ki, qalıb işimi davam etdirərdim. O zaman klub rəhbərliyində günah görərdim ki, nəticə ola-ola necə olur ki, məni istefaya göndərirsiz? Ancaq oyundan öncə verilən qərardı. Bu o deməkdi ki, klubda hər cür şərait yaradılıb. İmkanlarımızdan aşağı çıxış etmək bizim üçün uğursuzluq sayılır.
– Belə çıxır ki, “Rəvan”da ən böyük problem baş məşqçi ilə bağlıdı?
Bəli. Etiraf etməliyəm ki, bizdə ən böyük problem baş məşqçi ilə bağlıdı. Futbolçularımız normaldı. Çempionluq üçün "Rəvan"da hər cür şərait yaradılıb. Təkcə problem baş məşqçidi.
Səxavət QURBANOV
