Güləşçilərimizdən 2 qızıl medal
18.04.2023 , 23:44
Bu gün Azərbaycanın daha beş güləşçisi Xorvatiyanın paytaxtı Zaqrebdə keçirilən Avropa çempionatında mübarizə davam edir.
Korner.az xəbər verir ki, 61 kq çəki dərəcəsində çıxış edən İntiqam Vəlizadə təsnifat mərhələsində Taras Markoviçlə (Ukrayna) qarşılaşıb və uduzub.
74 kq-dakı Cəbrayıl Qadjiyev Simon Markla (Avstriya) qalib gəlsə də, Frank Çamisoyla (İtaliya) bacarmayıb.
86 kq-dakı Abubakr Abakarov eyni raundda Dauren Kuruqliyevə (Yunanıstan) məğlub olub.
92 kq çəki dərəcəsində yarışan Osman Nurmaqomedov yarımfinalda Slovakiya təmsilçisi Ermak Kardanovaya 6:0 hesabıyla qalib gələrək finala yüksəlib.
125 kq-dakı Georgi Meşvildişvili Gennadi Kudinoviçə (Almaniya) qalib gəlsə də, Taha Akgülünə (Türkiyə) uduzub.
Bu gün, həmçinin, digər beş sərbəst güləşçi medal görüşlərinə çıxıb.
57 kq-da Əliabbas Rzazadə “qızıl” uğrunda Süleyman Atlı (Türkiyə) ilə qarşılaşıb. O, rəqibinə 12:2 hesabı ilə qalib gələrək, Avropa çempionu olub.
70 kq çəki dərəcəsində çıxış edən Hacı Əliyev həlledici görüşdə bolqarıstanlı Ramazan Ramazanova 10:3 hesabı ilə qalib gəlib.
Maqomedxan Maqomedov 97 kq çəki dərəcəsində gürcüstanlı Givi Matçaraşvili ilə finalda üz-üzə gəlib. O, 3:4 hesabı ilə məğlub olub və ikinci yeri tutub.
Əli Rəhimzadə (65 kq) 1/8 finalda albaniyalı İslam Dudayevi mübarizədən kənarlaşdırıb – 5:2. Ancaq 1/4 finalda ermənistanlı Vazgen Tevanyana uduzub – 1:4. Rəqib finala yüksəldiyi üçün Rəhimzadə təsəlliverici görüşə çıxıb. İsrailli Coşua Finesilverə 7:0 hesabıyla qalib gələn Əli bürünc medal uğrunda qarşılaşmada ukraynalı Erik Aruşanyana minimal fərqlə (6:7) uduzub.
Avropa çempionatı aprelin 23-də yekunlaşacaq.
