Azərbaycan millisi BƏƏ-yə yollandı
16.02.2022 , 13:25
Azərbaycanın karate milli komandasının üzvləri federasiyanın prezidenti Yaşar Bəşirovun rəhbərliyi ilə mövsümün ilk rəsmi yarışına yola düşüb.
Korner.az xəbər verir ki, karateçilərimiz 18-20 Fevral tarixlərində Birləşmiş Ərəb Əmirliklərinin Fujeira şəhərində Karate1 Premyer Liqa seriyasından yarışda iştirak edəcək.
Milli komandanın heyətində 9 idmançı yer alıb. Kişilərin baş məşqçisi Qurban Tağıyev -60 kq çəki dərəcəsində Əminağa Quliyev və Sultan Hüseynovu, -67 kq-da Tural Ağalarzadə və Rafiz Həsənovu, -84 kiloqram çəki dərəcəsində Turqut Həsənov və Pənah Abdullayevi, 84+ kq çəkidə isə Asiman Qurbanlını heyətə cəlb edib. Böyük məşqçi Şahin Xudaverdiyev də idmançıları yarışda müşayiət edəcək. Qadınların baş məşqçisi Denis Morozov İrina Zaretskanın (-68 kq), Kata üzrə baş məşqçi Vahid Ayvazov isə Roman Heydərovun liqa turnirinə qatılmasına üstünlük verib.
Federasiyanın vitse-prezidenti Rəhman Hətəmov heyətlə bir yerdə olacaq. Beynəlxalq hakimlər Cahangir Babayev, Vüqar Kərimov, Anar Allahverdiyev və Rənad Əliyev Premyer Liqanı idarə edən hakimlər arasındadır. R.Əliyev həmçinin dərəcəsini yüksəltmək üçün artıq Dünya Karate Federasiyasının (WKF) Hakimlər komitəsinə imtahanlara qatılıb.
Fujeira Karate1 Premyer Liqa turnirində 55 ölkədən 342 idmançı iştirak edəcək.
