Şimal DRES qəsəbəsində yerləşən Ağır Atletika Akademiyasında kişilər və qadınlar arasında ağır atletika üzrə Azərbaycan çempionatı başa çatıb.
Korner.az-ın məlumçatına görə, ikinci yarış günündə körpücük üzərinə çəkisi 85, 94, 105 və +105 kq olan idmançılar çıxıblar.
“Zirvəçilər” bu dəfə də fərqlənərək komandanın hesabına 3-ü qızıl olmaqla, ümumilikdə 5 medal yazdırıblar.
94 kq çəki dərəcəsində qızıl medal uğrunda mübarizə xüsusilə maraqlı alınıb. “Sumqayıt-Zirvə” atleti Hüseynov Elnurla “Lənkəran-Zirvə” atleti Əliquluzadə Orxan arasındakı çempionluq savaşı ağır atletika sevərlərə həyəcan bəxş edib. Ard-arda çəkiləri ram edən idmançıların çıxışları alqışlarla müşayiət olunub. Sonda toplamda hər iki idmançı 313 kq nəticə göstərib. Ancaq şəxsi çəkisi rəqibindən az olan Hüseynov Elnur bu çəkidə Azərbaycan çempionu adını qazanıb.
Klubun daha iki qızıl medalı isə ağır çəkilərdə – 105 kq-da Səfərov Vasif, +105 kq-da isə Azər Məmmədlidən gəlib.
Beləliklə, “Zirvə” İdman Klubunun atletləri Azərbaycan çempionatında ümumilikdə 16 medal qazanaraq klubların yarışında hamıdan güclü olublar.
