Azərbaycanın daha 3 hakiminin beynəlxalq kateqoriyası 3 ulduza yüksəldi
17.04.2025 , 15:25
Boks üzrə Azərbaycan hakimləri – Anar Nağdıyev, Rövşən Qədirov və Qalib Əbiyevin beynəlxalq kateqoriyası 2 ulduzdan 3 ulduza artırılıb.
Korner.az xəbər verir ki, bu nailiyyətə Qədirovla Əbiyev Rumıniyanın Breila şəhərində təşkil olunan “Drakula Open”, Nağdıyev isə Bolqarıstanın paytaxtı Sofiyada keçirilən “Strandja” beynəlxalq turnirində imza atıb.
Beynəlxalq Boks Assosiasiyası yarışda nəzəri və praktiki dərslərə qatılan həmyerlilərimizin imtahandan uğurla keçdiyini açıqlayaraq, onların ulduzunu artırıb.
Bununla da, Azərbaycanda 3 ulduzlu hakimlərin sayı 5-ə yüksəlib. Daha öncə Emil Qurbanəliyevlə Anar Babanlı da bu kateqoriyaya yüksəliblər.
Azərbaycan Boks Federasiyası həm milli, həm də beynəlxalq kateqoriyaya malik hakimlərimizin peşəkarlıq səviyyəsinin artması, onların sayının çoxalması istiqamətində işləri davam etdirir.
