Güləş

Güləşçimiz Avropa çempionu oldu

29.03.2022 , 23:45

Bu gün Azərbaycanın dörd güləşçisi Avropa çempionatının final görüşünə çıxıb.

Korner.az-ın xəbərinə görə, Macarıstanın paytaxtı Budapeştdə təşkil edilən yarışda idmançımız Əliabbas Rzazadə (57 kq.) finalda Vladimir Yeqorovla (Şimali Makedoniya) üz-üzə gəlib. O, 6:8 hesabı ilə məğlub olub və gümüş medal qazanıb.

Üçqat dünya və Avropa çempionu, Olimpiya oyunlarının bürünc və gümüş mükafatçısı, yarışın reytinq favoriti olan Hacı Əliyev (65 kq.) isə həlledici görüşdə yerli idmançı İsmayıl Musikayevlə qarşılaşıb. Rəqibinə 1:12 hesabı ilə uduzan Əliyev gümüş medalla kifayətlənib.

Əşrəf Aşırov (79 kq) qızıl medal uğrunda yunanıstanlı Georgios Kuqiumtsidislə güləşib. 6:7 hesabı ilə məğlub olan idmançımız yarışı gümüş medalla başa vurub.

Maqomedxan Maqomedov (97 kq) isə finalda Macarıstan təmsilçisi Vladislav Baytsayevlə üz-üzə gəlib. 11:5 hesabı ilə qalib gələn güləşçimiz Avropa çempionu olub.

Daha bir güləşçimiz Zirəddin Bayramov (70 kq) isə bürünc medal uğrunda yarışıb. İlk hissəni Bayramov 6:0 hesabıyla öndə tamamlayıb. Ancaq ikinci hissədə aldığı ağır zədə məğlubiyyətlə (7:11) nəticələnib.

Son yazılar

Yuxarı