“Azərbaycan millisini kifayət qədər yaxşı təhlil etmişik”
12.11.2022 , 11:17
“inStat şirkətindəki tərəfdaşlarımızdan da məlumat alaraq, rəqibimizi kifayət qədər yaxşı təhlil etmişik”.
Korner.az xəbər verir ki, bu sözləri Moldova millisinin baş məşqçisi Sergey Kleşenko Azərbaycan yığmasına qarşı keçirəcəkləri yoldaşlıq oyunu barədə yerli federasiyanın rəsmi saytına açıqlamasında deyib.
50 yaşlı mütəxəssis bildirib ki, Canni De Byazinin baş məşqçi olduğu komandanın heyətindəki futbolçuların çoxu hazırda Avropa Liqasında uğurla çıxış edən “Qarabağ”ın üzvləridir:
“Onların legionerlərini də tanıyırıq. Prinsipcə, məşqçilər korpusu Azərbaycanla oyuna hazırdır və indi bizim vəzifəmiz bu məlumatı futbolçulara çatdırmaqdır”.
Kleşenko Türkiyə “Boluspor”unun formasını geyinən Vyaçeslav Posmakın qarşıdakı oyunları buraxacağını deyib:
“Bəxtimiz gətirdi ki, yalnız Posmak öz klubunun qərarı ilə yığmanın düşərgəsinə qoşulmayacaq. Digər futbolçular isə noyabrın 15-dək bizimlə olacaq”.
Noyabrın 16-da Kişinyovdakı “Zimbru” stadionunda keçiriləcək Moldova – Azərbaycan matçı saat 21:00-da başlayacaq.
