Ölkə futbolu

Azərbaycan futbolunda daha bir yeni sponsor

17.11.2021 , 21:16

“Avrora Qrup” Azərbaycan futbolunun inkişafı və uşaqların motivasiyası üçün iki böyük ilkə imza atıb.

Belə ki, şirkət “European Football Academy”nin (EFA) baş sponsoru olub.

Adıçəkilən akademiya AFFA-nın bayrağı altında keçirilən çempionatlarda iştirak edir. EFA bütün oyunlara “Avrora” loqolu formalarla çıxır.

“European Football Academy” 2017-ci ilin mayında təsis edilib. Məqsəd ilk növbədə nümunəvi vətəndaş, daha sonra isə ən gec 14 yaşdan etibarən Avropanın aparıcı Futbol Akademiyalarında məşqlərini və təhsilini davam etdirəcək uşaqlar hazırlamaqdır.

Məşqçilər qrupunun qarşısında qoyulan hədəflərdən biri də təkcə Avropa səviyyəli futbolçu yetişdirmək deyil, həm də cəmiyyətimizə və ölkəmizə sağlam bədənli, sağlam ruhlu insanlar verməkdir.

Fəaliyyətə başladığı ilk 2017/2018-ci il futbol mövsümündə AFFA-nın aşağı yaş qrupları üçün təşkil etdiyi ölkə çempionatında – ən kiçik yaş qruplarında (U-10 və U-11) olmaqla, 2 komanda ilə mübarizəyə qoşulub.

Təxminən 20-yə yaxın tələbə yarışlarda iştirak edərək, təcrübə qazanıb. 2018/2019-cu il futbol mövsümündə isə artıq 4 komanda ilə (U-10, U-11, U-12, U-14) AFFA bayrağı altında keçirilən ölkə birinciliklərində təmsil olunub.

Hal-hazırda EFA 5 yaş qrupu üzrə AFFA liqalarında mübarizə aparır. EFA ailəsi dedikdə, 5-14 yaş arası 150-yə yaxın uşaq Bakının müxtəlif rayonlarında keçirilən məşqlərdə mütəmadi olaraq iştirak edir.

Məşqlər UEFA kateqoriyalı məşqçilər tərəfindən xüsusi hazırlanmış proqram üzrə aparılır. Məşq proqramımız bütöv bir mövsümü əhatə etməklə bərabər, hər yaş qrupu üçün ayrı-ayrılıqda nəzərdə tutulmuş geniş bir plandır.

Mərkəzləşdirilmiş məşq prossesi akademiyanın koordinatoru tərəfindən nəzarətdə saxlanılır və həftəlik olaraq, məşqçilərə bütün məntəqələrdə eyni məşqlərin keçirilməsi tələbi qoyulur.

Futbol məşqlərindən əlavə, əsas komandaların oyunçularına digər idman növləri ilə məşğul olmaları tövsiyə edilir. Bu da akademiya tərəfindən tənzimlənir və nəzarətdə saxlanılır.

Koordinator tərəfindən iqlim nəzərə alınmaqla uşaqlar hovuz, atletika, gimnastika və akrobatika, döyüş idman növləri üzrə əlavə dərslərə yönəldilir.

Bundan əlavə, mütəmadi olaraq hər bir oyunçu üçün onların dəyərləndirilməsi anketləri (Evaluation Form) hazırlanaraq, əvvəlki dövrlərlə müqayisə edilir.

Zəif yönləri aradan qaldırmaq məqsədiylə fərdi məşqlər təyin edilir. Akademiyada məşqçilər tərəfindən təhsilə xüsusi önəm verilir. Mütəmadi olaraq dərs gündəlikləri yoxlanılır.

Dərslərdən geri qalan uşaqlarla söhbətlər aparılır, tədrisin önəmliliyi ön plana çıxarılır. Çünki futbol özü də bir zəka oyunudur.

Təsadüfi deyil ki, məşq proqramında şüur, düşüncə və təfəkkürlə bağlı olan (koqnitiv) məşqlərin xüsusi yeri var. Həmçinin uşaqlar arasında şahmat təbliğ edilir, öz aralarında oyunlar təşkil olunur.

Uşaqlara xarici dil bilməyin böyük əhəmiyyət kəsb etdiyi aşılanır. Gedəcəkləri xarici akademiyada daha tez uyğunlaşmaq, daha rahat olmaları üçün bunun vacib amil olduğunu vurğulanır.

Klubun psixoloqu uşaqların oyundan əvvəl motivasiyası ilə məşğul olmaqla bərabər, istər məktəbdə, istərsə də ailə və ya dostları ilə münasibətlərin güclü olması yönündə işlər aparır. (Sportinfo.az)

Son yazılar

Yuxarı