Ayxan Abbasov: “Yaxşı komanda məğlub olanda bilinir”
09.02.2019 , 20:59
Topaz Premyer Liqasının XVI turunda “Qarabağ” səfərdə “Sumqayıt”la qarşılaşıb. Oyun qonaqların 2:0 hesablı qələbəsi ilə başa çatıb.
Oyundan sonra keçirilən mətbuat konfransında meydan sahiblərinin baş məşqçisi Ayxan Abbasov matç haqda danışıb: “Çətin oyun oldu. “Qarabağ” çox istəkli başladı. Biz də yaxşı hazırlaşmışdıq. İlk 15-20 dəqiqə tam oyuna qoşula bilmədik. İlk hissədə üstünlük rəqibdədi idi. İkinci hissə “Sumqayıt”a layiq oyun oynadıq, buna görə futbolçulara təşəkkür etdim. İnanıram ki bu durumdan çıxa biləcəyik.”
Təcrübəli mütəxəssis daha sonra jurnaistlərin suallarını cavablandırıb:
– Start heyətdə gənclərə üstünlük vermişdiniz…
– Həftəiçi problemlərimiz oldu. Atilla xəstələnmişdi, Rail də tam sağalmamışdı. Əfran iki məşqi buraxmışdı, kiçik problemləri var idi. Əlimizdə olan futbolçulardan istifadə etdik. Yoldaşlıq görüşündə də özlərini pis göstərmədilər.
– Peyman Babayidən gözlədiyinizi ala bilirsinizmi?
– Bizim çempionat çətindir, hər hücumçu gəlib uğurlu çıxış edə bilmir. Peymanda potensial var. Onun əvəzlənməsinin səbəbi zədədir, əzələsi dartılmışdı. Tam üstünə gedə bilmərik, çalışacağıq, hər şey yaxşı olacaq.
– Son iki oyun uduzmaq futbolçulara necə təsir edib?
– Uduzmaq əlbəttə ki, pis təsir edir. Futbolda qalibiyyət də olur. Yaxşı komanda məğlub olanda bilinir. Bu nəticədən dərs çıxarmalıyıq. Qarşıda vacib oyunlar var, xal itirsək, çox çətin olacaq.
– İki fərqli “Sumqayıt” izlədik. Həqiqətənmi sizə Əfransız çətindi?
– Bu gün “Sumqayıt”da ən yaxşı futbolçulardan biri Əfrandı. Hücumçularımızın çox hissəsi onun üzərindən qurulur. İkinci hissə futbolçular bir az rahat oldu. Oynamağa davam edirdik, ancaq hücumda kəsərli deyildik. Bizdə olmağı böyük üstünlükdü
– Uzaqdan zərbələri az yoxlamağınız səbəbi nədir?
– Səbəb odur ki, vurmaq istəmirlər. Zəif nöqtələrimizdən biridi. Rəqib imkan yaratmadı, ancaq epizodlar var idi, sadəcə yoxlamadıq.
