Avro-2016-nın seçmə mərhələsinin formatı müəyyənləşib.
UEFA-nın sentyabrın
19-20-də Xorvatiyanın Dubrovnik şəhərində keçiriləcək İcraiyyə Komitəsinin təsdiqləyəcəyi
sistem vaxtından əvvəl mətbuata sızıb.
Belə ki, israilli həmkarlarımız
Avropa futbol qurumunun seçmə mərhələnin necə keçirilməsi ilə bağlı yekun fikrə
gəldiyini iddia edir.
Bu isə Azərbaycan
milli komandasının da növbəti seçmə mərhələdə necə mübarizə aparacağının müəyyənləşməsi
deməkdir. İddiaya əsasən seçmə mərhələdə qitənin 54 komandası çıxış edəcək.
Onlar hərəsində 6 komanda olmaqla 9 qrupda mübarizə aparacaq.
Ən maraqlısı
isə Avro-2016-nın ev sahibi Fransa da püşkatmada qruplardan birinə salınacaq.
Korner.az-ın məlumatına görə, digər
komandalar kimi 10 qarşılaşma keçirəcək Mişel Platininin həmyerlilərinin
qrupdakı bütün oyunları yoxlama xarakteri daşıyacaq və komandalara xal verilməyəcək.
Bir sözlə, 24 milli komandanın qatılacağı final mərhələsinə vəsiqəsi cibində
olan fransalılar seçmə mərhələdə müsabiqədənkənar oynayacaq.
Meydan sahibləri
ilə yanaşı, hər qrupda ilk 2 yeri tutanlar da birbaşa Avro-2016-ya vəsiqə əldə
edəcək. 3-cü yer sahibləri arasında ən yaxşı nəticəyə malik komanda da onlara
qoşulacaq. Qrupunda 3-cü olan digər 8 komanda isə pley-offda 4 vəsiqənin
sahibinin adına aydınlaşdıracaq.