2012-ci il London Yay Olimpiya Oyunları çərçivəsində keçiriləcək akademik avarçəkmə yarışlarının püşkatma mərasimi keçirilib.
Korner.az-ın məlumatına görə, püşk nəticəsində Azərbaycan təmsilçiləri Aleksandr Aleksandrov və Nataliya Mustafayevanın ilk rəqibləri müəyyənləşib. Hər iki avarçəkən mübarizəyə iyulun 28-də seçmə mərhələdən başlayacaq.
Aleksandrov kişilər arasında 1 nəfərlik qayıqla (M1X) mübarizə aparacaq. Bu qayıq tipində 33 idmançı 6 seçmə qrupa bölünüb. 3 seçmə qrupda 6, 3-də isə 5 avarçəkən yer alıb. 22 yaşlı təmsilçimiz 6 nəfərlik qrupa düşüb. Rəqiblər Lassi Karonen (İsveç), Anderson Noçetti (Braziliya), Matias Raymon (Monako), Ceyms Freyzer-Makkenzi (Zimbabve) və Pol Etia Ndumbe (Kamerun) olacaq. Onlar yerli vaxtla saat 12:50-də (Bakı vaxtı ilə saat 16:50) start xəttinə çıxacaqlar. 2000 metr məsafəyə seçmə yürüş nəticəsində qrupda ilk 3 yeri tutanlar ¼ finala, qalanlar isə təsəlli yürüşünə vəsiqə qazanacaqlar.
Mustafayeva isə qadınlar arasında 1 nəfərlik qayıqla (W1X) yarışacaq. Bu qayıq tipində 28 avarçəkən 5 seçmə qrupa bölünüb. 3 seçmə qrupda 6, 2-də isə 5 idmançı yer alıb. 27 yaşlı təmsilçimiz də 6 nəfərlik qrupa düşüb. Rəqiblər Kamila Varqas Palomo (Salvador), Kim Krou (Avstraliya), Mayçin Tornikroft (Zimbabve), Yariulvis Kobas (Kuba) və Yeji Kim (Cənubi Koreya) olacaq. Onlar start xəttinə Bakı vaxtı ilə saat 17:40-da çıxacaqlar. 2000 metr məsafəyə seçmə yürüş nəticəsində qrupda ilk 4 yeri tutanlar ¼ finala, qalanlar isə təsəlli yürüşünə vəsiqə qazanacaqlar.
