“Astana”nın təklifinə “yox” deyə bilmədim” – Riçard Almeyda
04.07.2018 , 14:51
“Astana”nın yeni transferi Riçard Almeyda klubun rəsmi saytına müsahibə verib. Əvvəlcə keçidi barədə danışan braziliyalı yarımmüdafiəçi daha sonra sualları cavablandırıb.
– “Astana”dan 2 həftə öncə təklif almışdım. Mənə və ailəmə maraqlı gəldiyindən “yox” deyə bilmədim. Bura Çempionlar Liqasında iştirak etmək və Qazaxıstanda çempion olmaq üçün gəlmişəm.
– Azərbaycan mətbuatında sizə Türkiyə, Yunanıstan, İtaliya kimi ölkələrdən təkliflər olduğu haqda xəbərlər dolaşırdı. Niyə məhz “Astana”?
– Haqlısınız, digər klublardan çoxlu təkliflər var idi. Ancaq sonda ailəm və menecerimlə bu qərara gəldik ki, Qazaxıstana gedib “Astana”da oynamaq mənim üçün daha faydalı olacaq.
– “Astana”da öz qarşınıza hansı hədəfləri qoyacaqsınız?
– Mən artıq Çempionlar Liqasının qrup mərhələsində oynamışam. “Astana” ilə növbəti dəfə Avropanın ən güclü klub turnirində iştirak etmək istəyirəm. Bilirəm ki, mübarizəyə birinci təsnifat mərhələsindən başlayacağıq və ora düşmək asan deyil. Ancaq əlimdən gələni etməyə çalışacağam ki, komandam qarşıya qoyulan məsələni həll etsin: Çempionlar Liqasının qrup mərhələsinə düşsün və Qazaxıstan çempionu olsun.
