“Arsenal” klubunun səhmdarlarından biri olan rusiyalı milyarder Alişer Usmanov da Rio Olimpiadasında baş verənlərə biganə qalmayıb.
Korner.az-ın məlumatına görə, məşhur iş adamı Olimpiya Oyunlarının qılıncoynatma yarışlarında uğurla çıxış edən həmyerlilərinin sevincinə şərik olub.
Beynəlxalq Qılıncoynatma Federasiyasının da prezidenti olan Usmanov azərbaycanlı baş məşqçi İlqar Məmmədovun çalışdırdığı Rusiya millisini İtaliyaya qonaq çağırıb.
Olimpiadada 4 qızıl, 1 gümüş və 2 bürünc medal qazanan şimallıların milyarderdən dəvət almasını həmyerlimizin özü açıqlayıb: “Usmanov bütün yığmanı avqustun sonuna İtaliyaya dəvət edib. Avqustun 27-də oraya yollanırıq. Bütün komanda öz ailə üzvləri ilə birgə olacaq. Sentyabrın 3-dək İtaliyada qalacağıq”.
Qeyd edək ki, səfərə yollanacaq heyətdə Azərbaycan millisinin sabiq üzvü Yelena Jemayeva da olacaq. O, həm yığmanın məşqçilərindən biri, həm də Məmmədovun həyat yoldaşı kimi qonaqlığa dəvətlilərdəndi. (apasport.az)
