“Mənim istefa verməyimdən söhbət gedə bilməz”.
Korner.az-ın məlumatına görə, bunu “Neftçi”nin baş məşqçisi Arif Əsədov deyib.
Mətbuatda paytaxt klubunun prezidenti Sadıq Sadıqovun istefaya göndərildiyi haqda xəbər yayıldı. Sonradan məlum oldu ki, Sadıqov istefa verməyib, sadəcə klubda struktur dəyişikliyi olub. Lakin “Neftçi”nin prezidenti müsahibəsində yorulduğunu və kluba yeni rəhbərin lazım olduğunu deməklə, gedəcəyini istisna etməyib. Sadıqovla yanaşı, klubun digər rəsmilərinin, o cümlədən baş məşqçi Arif Əsədovun da “Neftçi”dən ayrılacağı ilə bağlı söz-söhbətlər səngimək bilmir.
Məsələ ilə bağlı münasibətini bildirən Əsədov işini davam etdirəcəyini deyib: “Sadıq Sadıqovun istefa verdiyi ilə bağlı dünən xəbərlər yayılmışdı. Lakin klub prezidentinin özü bunu təkzib edərək, məsələyə aydınlıq gətirdi. Məncə, bundan sonra istefa barədə münasibət bildirmək düz çıxmaz. Mənə gəlincə, kim deyir ki, “Neftçi”dən gedirəm? Mənə bu barədə heç kim bir söz deməyib. Klubla 2 illik müqaviləm var. Odu ki, işimi davam etdirirəm”.
Apasport.az