“Araz-Naxçıvan”ın bugün köhnə “Neftçibaza”da baş tutan axşam məşqini sloveniyalı menecer və iş adamı İqor Branko da izləyib.
Korner.az-ın məlumatına görə, klubun meneceri Tahir Əliyevin dəvəti ilə Azərbaycana təşrif buyuran Branko səfəri barədə danışıb:
“Keçən ilin dekabr ayında Sloveniyada klubunuzun meneceri Tahir Əliyevlə görüşdük və fikir mübadiləsi apardıq. Xüsusi olaraq uşaq futbolu barədə danışdıq. İlk görüşümüz zamanı meneceriniz məni Azərbaycana dəvət etdi. Bu gün komandanızın Bakıda baş tutan axşam məşqini izləməyə müvəffəq oldum. Heyətinizdə yaxşı və texnikalı oyunçularınız var. Mən də öz təkliflərimi vermişəm. Komandanız Premyer Liqaya yüksələcəyi təqdirdə yəqin ki, heyətinizdə sloveniyalı futbolçuların top qovması mümkün olacaq. Komandanıza qarşıdakı oyunlarda uğurlar arzulayıram”.
