“Araz-Naxçıvan rekordunu təkrarladı
11.11.2024 , 10:00
“Araz-Naxçıvan” bir mövsüm ərzində qazanılan qələbə sayında tarixinin rekordunu təkrarlayıb.
Korner.az xəbər verir ki, Elmar Baxşıyevin komandası cari çempionatda 9-cu dəfə qalib gəlib. Naxçıvan təmsilçisi Misli Premyer Liqasının 13-cü turunda “Sumqayıt”ı bir qolla məğlub edib.
“Araz-Naxçıvan” bunadək mövsüm ərzində ən çox qələbəni ötən çempionat əldə edib. Komanda 2023/24 mövsümünün 36 görüşündə 9 dəfə üç xala sevinib. Bu dəfə Baxşıyevin yetirmələri eyni sayda qələbəni 13 matçda qazanıb. Növbəti qələbə yeni rekordla əlamətdar olacaq.
Qeyd edək ki, Naxçıvan klubu mübarizəni erkən dayandırdığı çempionatı saymasaq, yüksək dəstədə 4-cü mövsümünü keçirir.
