Antonio Konte “Napoli”də qısamüddətli fasilə götürdü
13.11.2025 , 20:36
UEFA Çempionlar Liqasının 5-ci turunda “Qarabağ”la qarşılaşacaq “Napoli”nin baş məşqçisi Antonio Konte komandadan müvəqqəti ayrılıb.
Korner.az xəbər verir ki, italiyalı mütəxəssis milli komandalar üçün yaranan fasilədən istifadə edərək istirahətə yollanıb.
A Seriyasının 11-ci turunda “Bolonya”ya 0:2 hesabı ilə uduzan “Napoli”də Konte bir həftəlik fasilə götürüb. O, bu müddətdə komandanı köməkçisi Kristian Stelliniyə həvalə edib. Məlumata görə, fasilə əvvəlcədən klub rəhbərliyi ilə razılaşdırılıb və Konte hazırda Turin şəhərindədir.
“Napoli” İtaliya çempionatında 11 turdan sonra 22 xalla 4-cü yerdə qərarlaşıb, liderlər “İnter” və “Roma”dan 2 xal geri qalır. Komanda Çempionlar Liqasında isə 4 oyundan topladığı 4 xalla 24-cü pillədədir.
Qeyd edək ki, “Napoli” ilə “Qarabağ” arasında qarşılaşma noyabrın 26-da, Bakı vaxtı ilə 00:00-da İtaliyada keçiriləcək.
