“Sumqayıt”ın futbolçusu Can Akgün Almaniya mətbuatına müsahibə verib.
– Regionalliqada çıxış edən “Berliner”dən Azərbaycanın Premyer Liqasında mübarizə aparan “Sumqayıt”a keçdiniz. Karyeranızda dönüş yaratmağınız necə mümkün oldu?
– “Sumqayıt” ötən ilin yayında “Berliner”dən 2 futbolçu transfer etmək istəyirdi. Baş məşqçi Bernhard Raabın seçim üçün gəlib matçımıza baxdı. Onun izlədiyi qarşılaşmada qol vurmağı bacardım. Lakin həmin vaxt keçidim mümkün olmadı. Yalnız qışda klubla bağlılığıma son qoya bildim. Onda da Azərbaycandan dəvət gəldi. Əslində məni baxışa çağırmışdılar. Lakin cəmi 2 məşqdən sonra özümü göstərə bildim və müqavilə imzaladıq. Hər şey çox tez baş verdi.
– “Sumqayıt”a hansı məqsədlə keçmisiniz?
– Məqsədim peşəkar səviyyədə daha çox oynamaqdır. “Sumqayıt”da özümü göstərmək imkanı qazandım. Azərbaycan yığmasına da cəlb olundum. Bir sözlə artıq məqsədimə çatmışam və indi daha böyük hədəflərim var.
– Oynadığınız komandanın indiki hədəfi nədir?
– İndi bizim çempionatda 2-ci mərhələ yeni start götürür. Mümkün qədər çox xal toplamaq niyyətindəyik. Artıq komandamız yaxşı futbol oynayır. Təəsüf ki, rəqiblərimiz əksər hallarda daha yaxşı oynayır (gülür).
– Azərbaycan çempionatının səviyyəsini necə qiymətləndirirsiniz?
– Azərbaycanda komandalar həm maddi, həm də idman baxımından inkişaf edir. Məsələn “Neftçi” bu mövsüm Avropa Liqasının qrupunda çıxış etdi. Bu da çempionatın gücündən xəbər verir. Ümumilikdə götürəndə Azərbaycan klubları 2-ci, 3-cü Bundesliqa komandaları ilə müqayisə oluna bilər.
– Azərbaycanda futbola maraq necədir, azarkeşlər oyunlara gəlir?
– İlk səfər matçımda Bakıdan təxminən 250 km məsafədə olan Lənkəranda oynayırdıq. Qarşılaşmaya 10 min azarkeş gəlmişdi. “Xəzər Lənkəran” ən çox azarkeş toplayan komandadır. Digər oyunlarda isə 3-5 min azarkeşdən çox olmur.
– Azərbaycanda məşq prosesi necə keçir?
– Həftədə 7 dəfə məşq edirik. İki gün 2 dəfə hazırlıq keçirlk. Əsasən toplu çalışmalara üstünlük verilir.
– Ora uyğunlaşmağınız necə keçir?
– “Berliner”dəki komanda yoldaşlarım Murat Doymuş və Pərdis Fərcad-Azadla birlikdə Bakıdakı 4 otaqlı mənzildə qalırıq. Azərbaycan dili türkcəyə çox yaxındır. Ən pis halda sözü təkrarlamaqlarını istəyirəm ki, yaxşı başa düşüm.
