“Alınmasa faciə olmayacaq” – Ayxan Abbasov
01.02.2020 , 20:34
Azərbaycan Premyer Liqasında XV turun “Neftçi” – “Sumqayıt” oyunundan (1:1) sonra təşkil edilən mətbuat konfransında qonaq komandanın baş məşqçisi Ayxan Abbasov jurnalistlərin suallarını cavablandırdı.
Korner.az xəbər verir ki, əvvəlcə görüş barədə fikirlərini bildirdi
– Qış fasiləsindən sonra ilk oyun həmişə çətin olur. Futbolçuların əzmkarlığı bizi qane etdi. İstədiyimiz qolu vurduq. Rəqib də azlıqda idi. Amma fasilədən sonra gözlədiyimiz başımıza gəldi. Rəqib əks-hücumlarda oynadı. Biz isə ələ düşən imkanlardan istifadə edə bilmədik. Bu gün iki xal itirdik. Komandanın əzmkarlığı məni sevindirdi. Yoxlama oyunlarında gördüklərimizin davamı gəldi.
– “Qəbələ” ilə matçda da rəqib iki nəfər azlıqda mübarizə aparmışdı. Sanki buna uyğun planınız yoxdu…
– İkinci hissədə 4-5 qol epizodumuz var idi. Oyun qura bilməsək, o imkanları yarada bilməzdik. Rəqib azlıqda qalanda motivasiyası, döyüşkənliyi artır. “Neftçi”nin heyətində təcrübəli, usta futbolçular var. Bizdə sadəcə son nöqtəni qoymaq çatmadı.
– “Neftçi”nin qolunda oyundankənar vəziyyət var idimi?
– Bu, televiziyada oyunun icmalında yəqin ki, müzakirə ediləcək. Orda səhvlər deyiləcək.
– Komanda yaxşı qaçır, oynayır. Tempi qorumaq üçün rezervləriniz kifayətdi?
– Hər bir məşqçi istəyər ki, geniş heyəti olsun. Qarşıya ciddi məqsəd qoymuşuqsa, ehtiyat qüvvə çox olmalıdı. Cavan oyunçularımız var. Antalyada da gənclərə üstünlük verirdik. Qorxmuruq. Avropa alınacaqsa, daha yaxşı olacaq. Alınmasa da, faciə olmayacaq və biz ölkə futbolu üçün bir neçə futbolçu qazanarıq.
– Millinin baş məşqçi postuna namizədlər sırasında olduğunuz deyilir…
– Birdən-birə soruşduz (gülür). Milli hamımız üçün şərəfdi. Bu gün məni ora namizəd sayırlarsa, qürurvericidi. Qısa zamanda o siyahıda yer almaq şərəfdi. Amma indi “Sumqayıt”dayam. Nə vaxt kömək lazım olsa, mən heç bir təmənna güdmədən milliyə kömək etməyə hazıram.
– Növbəti turda qarşılaşacağınız “Zirə” bu gün “Sabah”a 2 cavabsız qolla qalib gəldi. Sabiq komandanızla oyunda büdrəmək ehtimalınız nə qədərdi?
– “Zirə” ilə prinsipiallığımız yoxdu. Keçən il bunu başa vurduq (gülür). Zaur Həşimov yaxın dostumdu. Ona da uğurlar arzulayıram. Qışda lazımı mövqelərə oyunçular alıblar. Geniş heyətə malikdilər. Rıqibi analiz edəcəyik. Öz azarkeşlərimizin qarşısında çıxış edəcəyik. Vacib oyundu. Çalışacağıq ki, komandanı hazırlayaq.
