Aftandil Hacıyev: “Futbolçularımız tam hazır deyil”
29.06.2019 , 12:28
Bolqarıstanda təlim-məşq toplanışında olan “Səbail” Rumıniyanın “Klinçeni” klubu ilə yoxlama görüşü keçirib. Oyun qolsuz heç-heçə ilə yekunlaşıb.
Korner.az klubun saytına istinadən xəbər verir ki, paytaxt təmsilçisinin baş məşqçisi Aftandil Hacıyev oyunla bağlı fikirlərini bölüşüb:
“Növbəti yoldaşlıq görüşümüzü keçirdik. Bu dəfə rəqibimiz Rumıniya komandası idi. UEFA Avpora Liqasında da rəqibimiz Rumıniya komandası olduğuna görə, bizim üçün bu komanda ilə oynamaq böyük əhəmiyyət kəsb edirdi. Rəqibimiz mübariz, təcrübəli bir komanda idi. Hətta heyətlərində bizim çempionatdakı “Zirə” komandasından Qabriel Matey və “Neftçi”dən Derlis Meza Kollini də görə bilərik. Düşünürəm ki, maraqlı oyun alındı”.
37 yaşlı mütəxəssis tam hazır olmadıqlarını deyib:
“Komandamıza gəldikdə isə, əlbəttə ki, hələ futbolçularımız tam hazır deyil, lakin çalışırıq ki, hər bir futbolçuya fərdi yanaşaq. Onların fiziki durumunu balanslaşdırmaq üçün müəyyən dəqiqələrə bölmüşük. Yeni futbolçularımızdan Mirabdulla və Eriko bu gün heyətdə yer almışdılar. Bundan sonra çalışacağıq ki, komandanı iyulun 11-də keçirəcəyimiz oyuna formalaşdıraq. Bu oyunda ən çox xoşuma gələn məqam o oldu ki, əvvəlki oyunlarla müqayisədə futbolçular daha intizamlı və diqqətli oynadılar. Bundan sonra oyunlarımızı daha da yaxşılaşdırmağa səy göstərəcəyik”.
