AFFA-nın İntizam Komitəsinin iclası keçirilib. Korner.az-ın məlumatına görə, toplantıda Topaz Premyer Liqasının VII turunda baş verən qayda pozuntularına hüquqi qiymət verilib.
Topaz Premyer Liqasının VII turunun “Turan” – “Xəzər Lənkəran” matçında “Xəzər Lənkəran” klubunun 4 futbolçusu sarı vərəqə ilə cəzalandığı üçün klub 1000 manat cərimə olunur .
Oyunun 23-cü dəqiqəsində “Xəzər Lənkəran” klubunun 15 №-li futbolçusu Ruslan Abışov kobud oyuna görə birbaşa qırmızı vərəqə alaraq meydandan kənarlaşdırılmışdır. Lakin matçın videoyazısını izlədikdə futbolçunun məqsədinin topa zərbə endirmək olduğu aşkar edilmiş və epizod təhlükəli oyun kimi qeydə alınmışdır. Bu səbəbdən futbolçuya göstərilən qırmızı vərəqə ləğv edilir və epizod sarı vərəqə ilə qiymətləndirilir.
Oyunun fasiləsində “Xəzər Lənkəran” klubunun məşqçisi Zaur Ramazanov hakimləri təhqir etdiyi üçün 5 oyunluq cəzalanır, klub 5000 manat cərimə olunur.
Matçın 78-ci dəqiqəsində “Xəzər Lənkəran” klubunun 5 №-li futbolçusu Elnur Allahverdiyev hakimə tüpürdüyünə görə birbaşa qırmızı vərəqə alaraq meydandan kənarlaşdırıldığı üçün futbolçu 6 oyunluq cəzalanır, klub 5000 manat cərimə olunur.
