.jpeg)
Futbol üzrə 2020-ci il Avropa çempionatının ev sahibliyinə namizədlikdən imtina edən Azərbaycan iddiaçı ölkələrdən Türkiyəni dəstəkləyəcək.
“TRT”nin rəsmi saytının verdiyi məlumata görə, AFFA Türkiyəyə açıq dəstək verdiyini açıqlayıb.
Əslində, Azərbaycan nüfuzlu yarışa Gürcüstanla birgə namizədliyini irəli sürmək niyyətində olub. Lakin sonradan ölkəmiz bütün diqqətini Bakının 2020-ci il Yay Olimpiya Oyunlarına ev sahibliyi uğrunda mübarizəsinə yönəltməyi məqsədəuyğun sayıb. Bu halda Gürcüstan futbol yarışına namizədliyini təkbaşına irəli sürüb. Eyni zamanda, İrlandiya, Şotlandiya və Uels də birgə iddia ərizəsi ilə UEFA-ya müraciət edib. Beləliklə, namizədliyini hələ ötən ay açıqlamış Türkiyəyə rəqiblər ortaya çıxıb.
Azərbaycan isə bu mübarizədə Türkiyəyə dəstək verməyi məqsədəuyğun sayıb. Amma çempionat qardaş ölkədə keçirilsə, 2020-ci il olimpiadası İstanbulda təşkil oluna bilməz. Hər halda UEFA prezidenti Mişel Platini belə açıqlama verib. Bu halda İstanbul şəhərinin olimpiadaya namizədliyini Bakının xeyrinə geri götürəcəyi gözlənilir.
AFFA-nın Mətbuat və İctimaiyyətlə Əlaqələr Departamentinin rəhbəri Mikayıl Nərimanoğlu isə Lent.az-a açıqlamasında Türkiyəyə dəstək vermələrindən məlumatsız olduğunu bildirib.
Qeyd edək ki, hələlik UEFA Avro-2020-yə namizədlərin yekun siyahısını açıqlamayıb. 2020-ci il Yay Olimpiya Oyunları uğrunda mübarizədə növbəti mərhələyə keçəcək şəhərlərin adları mayın 23-də, qalib isə 2013-cü il sentyabrın 7-də məlum olacaq. Olimpiadaya Bakı və İstanbuldan əlavə, Doha (Qətər), Madrid (İspaniya) və Tokio (Yaponiya) da iddialıdır.
lent.az
