“Zaqatala” məni çox istədi və …” – “Kəpəz”dən incik gedən futbolçu
07.07.2022 , 10:22
“Kəpəz”də özümü əsas heyət üzvü kimi görürdüm və buna hazır idim. Lakin əsas heyətdə az şans qazanırdım. Sözün düzü mövsümün ortasında artıq mən bilirdim ki, komanda Premyer Liqada çıxış etsə mən o heyətdə olmayacam”.
Bu sözləri Korner.az-a açıqlamasında “Kəpəz”in sabiq futbolçusu İbrahim Qədirzadə deyib.
“Xəzər Lənkəran”, “Qarabağ” və “Neftçi”də forma geyinmiş yarımmüdafiəçi daha sonra sözlərinə belə davam edib:
“Bəzi suallar var ki, ona baş məşqçi cavab verə bilər. Mən və mənim kimi bir neçə futbolçu da var idi ki, oynamaq şansı qazana bilərdi. Biz özümüzü meydana çıxmağa hazır hesab edirdik. Lakin olmadı. Məhz belə şeylərə görə komanda ötən mövsümü layiq olmadığı yerdə bitirdi”.
Hazırda “Zaqatala” ilə anlaşan futbolçu mümkün keçidlə bağlı da fikirlərini bildirib:
“Zaqatala” mənə doğma komandadı. Bu komandanı seçməyimdə əsas məqamlardan biri də məşqçilər korpusunu məni çox istəməyi oldu. Başqa təkliflər də var idi. Lakin “Zaqatala” bu variantlar arasında düşünmədən qərar verdiyim oldu. Mən də mənə inanan məşqçilər korpusunun bu inamını doğrultmağa, “Zaqatala”ya xeyir verməyə çalışacam”.
Qeyd edək ki, müxtəlif illərdə millimizin aşağı yaş qruplarında da çıxış edən İbrahim Qədirzadə Gürcüstanda da legioner həyatı yaşayıb.
