AZAL-ın baş məşqçisi Tərlan Əhmədov bu gün “Neftçi” ilə Topaz Premyer Liqasında 25-ci turunun oyunundan (1:1) sonra mətbuat konfransı keçirib.
Korner.az-ın futbolinfo.az saytına istinadən yaydığı xəbərə görə, heç-heçəni belə şərh edib:
– Hiss edirdim ki, komanda oyuna qədər həyəcanlı idi. 3 xal üçün oynayırdıq, amma məcburi əvəzetmələr işimizi çətinləşdirdi. İkinci hissədə müdafiəyə qapandıq, ilk hissədə istədiyimiz oyunu qura bilirdik. Heç-heçə oyunun ədalətli nəticəsi idi. Futbolçularıma da təşəkkür etdim ki, axıra kimi mübarizə apardılar. “Neftçi” də öz adını qoruyub saxlamaq istəyir, amma futbolda zəif büdcə anlayışı yoxdur, hər kəs öz rəqibinə hörmətlə yanaşmalıdır. Heç kimdən zəif futbol oynamırıq, nə də heç kimdən zəifik.
– UEFA rəsmisi bildirdi ki, “Zirə”nin avrokuboklara getməsi qeyri-mümkündür, “İnter”in gedəcəyi də məlum deyil. AZAL 5 və 6-cı pillələr uğrunda mübarizə apararaq, avrokuboklara vəsiqə qazana bilər?
– Bu gün fikirləşmirəm ki, “Zirə” və “İnter” yıxılsın, mən avrokuboklara gedim. Mövsümün əvvəlində ilk 5 turdan sonra 1 xalımız belə yox idi, hətta deyirdilər, qışa qədər AZAL 6 xal toplaya bilməz, indi 33 xalımız var. Bəli, indi avrokuboklarda oynamaq şansımız yaranıb. Bunun üçün çalışıram. Avrokubokları komandam üçün məqsəd qoymuşam, Premyer Liqada qalmaq hədəfini yerinə yetirmişik. Bu gün büdcələri 3-4 milyon olan komandalara qarşı layiqli oyun göstərə biləriksə, deməli, nəsə etmişik. Bu, futbolçularımın əməyidir.
– Vəli Qasımov futbolçu kimi təhlükəli rəqibdir, yoxsa baş məşqçi kimi?
– Vəli Qasımov böyük futbolçu olub. Vaxtı ilə 19 yaşlılardan ibarət milli komandada bir yerdə işləmişik. Əgər bu gün heç-heçə etmişiksə, deməli, ikimiz də təhlükəli məşqçilərik.
– Komandanız bu gün istənilən oyunu göstərə bilmədi…
– Ən zəif oyunlarımızdan birini keçirdik. “Neftçi” ilə aramızda 1 xal fərqi var idi, o da komandada həyəcan yaradırdı.
– Həm Əsgər Abdullayevli, həm Samir Əliyevli, bu gün də Vəli Qasımovlu “Neftçi”yə qarşı mübarizə apardınız. Hansı məşqçinin komandası ilə oynamaq daha çətin idi?
– Gəlin, müqayisə aparmayaq, hər üçü mənim üçün əziz insanlardır.
