Topaz Premyer Liqanın 24-cü turunda keçirilən “Qarabağ” – “Zirə” oyunundan (2:0) sonra qonaq komandanın baş məşqçisi Adil Şükürov görüş haqda fikirlərini bildirib.
Korner.az-ın xəbərinə görə, o, məğlubiyyəti belə şərh edib:
– Ağır oyun oldu. Belə olacağını gözləyirdik. Buna baxmayaraq, mübarizə apardıq. Ancaq bir neçə səhvə yol verdik. Çalışacağıq, növbəti oyunlarda bu səhvlərə yol verməyək.
Zədəlilərimiz də var idi. Ümumi götürdükdə, “Qarabağ”a çox hücum qurmağa imkan vermədik. Sürətli əks-hücumlar qurmağa çalışsaq da, buna bəzi oyunçuların ustalığı çatmadı. Mövsümün əvvəlində bizə qoşulan futbolçuların çoxu öz klublarında ehtiyatda qalan futbolçular idi. Ancaq onlar bizdə yaxşı oyun sərgiləməyi bacardılar.
– Bir müddət öncə “niyə də çempionluğa oynamayaq?” demişdiniz…
– Çempionluğa oynayan komanda belə səhvlər etməməlidir. Dediyim kimi, gələn oyunlarda bu səhvlərə yol verməməliyik. Çempionluq barədə əvvəlcədən heç düşünməmişik. Bizim əsas məqsədimiz yaxşı komanda yaratmaqdır. (Qol.az)
