“Qəbələ” Azərbaycan Premyer Liqasında ev oyunlarındakı qələbəsizlik seriyasına son qoyub.
Korner.az-ın məlumatına görə, Roman Qriqorçukun rəhbərlik etdiyi komanda Qəbələdə 133 gündən sonra çempionat matçında qalib gəlib.
Həm də bu, 2016-cı ildə ilk ev oyununa təsadüf edib. “Qırmızı-qaralar”ın çempionatda sonuncu ev qələbəsi VII turda – oktyabrın 4-də “Xəzər Lənkəran” üzərində olub – 6:0. Yeri gəlmişkən, bu, cari çempionatda ən böyükhesablı qələbədir. Meydan sahibləri Qəbələdə sonrakı 6 matçda qalib gələ bilməyib.
“Qəbələ”yə bu il ilk ev qələbəsini qazandıran “Xəzər Lənkəran”la oyunda son nöqtəni qoyan futbolçusu olub. Bu, Bosniya və Herseqovina yığmasının da üzvü olan hücumçu Ermin Zetsdir. Lənkəranlılarla matçda 89-cu dəqiqədə fərqlənən 28 yaşlı legioner yenə ikinci hissədə (69-cu dəqiqədə) öz sözünü deyib.
Ümumiyyətlə, Zets son vaxtlar məhsuldarlığı ilə diqqət çəkir. Əvvəla, “Qəbələ” son 2 oyununu – bundan öncə səfərdə “İnter”i də məhz onun vurduğu qolla məğlub edib – 1:0. “Qırmızı-qaralar”ın çempionatdakı son 3 qolunun müəllifi də Zetsdir. Ötən ilin son turunda “Qarabağ”la səfər matçında (1:1) da “Qəbələ”nin yeganə qolunu o vurub. “Qəbələ” qış fasiləsindən sonra ilk turda “Kəpəz”lə Gəncədəki matçda meydanı qolsuz tərk edib – 0:3.
Azərbaycanda qol hesabını “Kəpəz”lə Qəbələdəki oyunda açan (maraqlıdır ki həmin oyun da 1:0 hesabı ilə “Qəbələ”nin xeyrinə bitib) Zets çempionatda hesabındakı qolların sayını artıq 5-ə çatdırıb. O, bu göstəricidə “Qəbələ”nin çempionatdakı bombardiri, 6 qola imza atan ukraynalı həmkarı Aleksey Antonovla fərqi minimuma endirib. Ölkə kubokunda “Mil-Muğan”la 1/8 final matçında (Qəbələdə 7:0) da fərqləndiyini nəzərə alsaq, artıq Zets 6 qolla “qırmızı-qaralar”ın cari mövsümdə bombardirlərindən birinə çevrilib.
Mehman SÜLEYMANOV
