“Çox böyük açıqlama vermək istəmirəm. Bilirik, ki güclü bir komandaya qarşı oynayırıq. “Tottenhem” hazırda ən yaxşı vaxtlarını yaşayır. Belə bir komandaya qarşı düzgün və səhvsiz oynamalıyıq. İnanıram ki, futbolçularım onlardan gözlənilən oyunu göstərəcəklər. Hər biri bu məsuliyyəti hiss edir”.
Korner.az-ın məlumatına görə, bu sözləri “Qarabağ”ın baş məşqçisi Qurban Qurbanov Avropa Liqasının qrup mərhələsində “Tottenhem”lə keçiriləcək oyun üçün təşkil olunan mətbuat konfransında deyib.
– Rəqib 7 əsas futbolçusunu Bakıya gətirmir. Bu sizin üçün əlavə üstünlük ola bilərmi?
– Sözün açığı, hələ bilmirəm rəqib kimləri gətirir. Komandada 7 yox, çox sayda güclü futbolçu var. Yenə qeyd edirəm rəqib böyük bir klubdur. Heyətində olan hər bir futbolçu bu dəqiqə gözləyir ki, yer boşalsın və oynamaq imkanı yaransın, özünü subut etsin. Hər zaman qeyd etmişəm ki, bəzən bu amillər bizim ziyanımıza işləyir.
– Rəşad Sadıqov sabahkı oyunda meydana çıxacaq? Hansısa dəyişikliklər ola bilərmi heyətdə?
– Ola bilər hər hansı bir dəyişiklik olsun. Amma çalışırıq ki, Avropa Liqasında az dəyişiklik edək. Çünki çox sayda daim bir yerdə oynayan futbolçularla meydana çıxmaq istəyirik. Rəşad Sadıqovun oynamaq ehtimalı var. Amma sabahkı müayiədən sonra dəqiq bilinəcək.
