AFFA Hakimlər Komitəsinin sədri Xaqani Məmmədovun 2001-ci il, ilyulun 28-də – UEFA kubokunda “Osiek” (Xorvatiya) və “Dinaburq” (Latviya) arasında keçirilən cavab matçı üçün “qiymət davası” döydüyü videonu təqdim etmişdik.
Korner.az-ın məlumatına görə, publika.az məsələ ilə bağlı Xaqani Məmmədovdan açıqlama almaq istəsə də, o, zəngləri cavabsız qoyub.
Əvəzində, həmkarlarımız matçın baş hakimi olmuş Asim Xudiyevin münasibətini öyrənə bilib: “Sizə də deyirəm, bu matçda heç bir gözlənilməzlik qeydə alınmamışdı. “Osiek” güclü idi və 1:0 hesabıyla qalib olaraq növbəti mərhələyə keçdi.
Düzdür, ikinci hissədə Xaqani Məmmədovla Ramiz Əsədovun pul söhbəti ilə bağlı danışdığının şahidi oldum. Amma düzünü deyirəm, oyun zamanı söhbətin nədən getdiyini, nə barədə olduğunu anlamamışdım. Çünki mənim bütün fikrim, ağılım ancaq oyunda idi. Ancaq oyundan sonra isə söhbətin nədən getdiyini anlaya bildim. Bunun oyunun gedişatına heç bir təsiri olmadı. Bu baxımdan vicdanım təmizdir”.
