Bu mövsümün çempionu “Qarabağ” oldu. Əslində, hələ mövsümün əvvəlindən çempionluğun işartıları görünürdü. Və gözlənilən də baş verdi. “Qarabağ” bu il, həqiqətən də, çempionluğa layiq idi. İstər oyun baxıımından, istərsə də digər komponentlərdə rəqiblərindən bir baş üstün görünən “köhlən atlar” sonda qızıl medallara qovuşdu. Biz də öz növbəmizdə komandanın dövrələr üzrə nəticələrini və “çempionluğa gedən yolu”nu incələməyi qərara aldıq.
I dövrə
Dövrəyə əsasən komandanın göstərdiyi nəticələr:
“Qarabağ” (9 oyun, 5 qələbə, 3 heç-heçə,1 məğlubiyyət) 18 xal
Ümumi nəticəyə əsasən komandanın mövqeyi.
1. “Qarabağ” (9 oyun, 5 qələbə, 3 heç-heçə,1 məğlubiyyət) 18 xal
Bu dövrü “Qarabağ” üçün həm uğurlu, həm də uğursuz hesab etmək olar. Komanda Avropa Liqasında “Ayntraxt”la görüşə qədər qarşısına gələni əzib keçirdi. Amma sonradan qəfil eniş yaşandı. Axı “köhlən atlar” Avropada mübarizəni dayandırmışdı. Məhz bunun psixoloji yükü altında ardıcıl xal itkiləri yaşandı. Buna baxmayaraq, “Bakı” üzərindəki parlaq qələbə (3:0) dövrəni major notlarla bitirməkdə yardımçı oldu.
II dövrə
Dövrəyə əsasən komandanın göstərdiyi nəticələr.
“Qarabağ” (9 oyun, 5 qələbə, 3 heç-heçə, 1məğlubiyyət) 18 xal
Ümumi nəticəyə əsasən komandanın mövqeyi.
1. “Qarabağ” (18 oyun, 10 qələbə, 6 heç-heçə, 2məğlubiyyət) 36 xal.
“Neftçi”,”İnter”,”Xəzər Lənkəran” kimi iddialıların asanlıqla məğbul edildiyi halda, AZAL,”Rəvan” və “Simurq” səddi keçilməz oldu. Maraqlıdır ki, ilk dövrədə də bu komandalar “Qarabağ” üçün məğlubedilməz idi. Bu dövrəni də klub üçün uğurlu saya bilərik. Axı “köhlən atlar” qış fasiləsinə də lider kimi yollanmışdı.
III dövrə
Dövrəyə əsasən komandanın göstərdiyi nəticələr.
“Qarabağ” (7 qələbə,1 heç-heçə, 1 məğlubiyyət) 22 xal
Ümumi nəticəyə əsasən komandanın mövqeyi.
1. “Qarabağ” (27 oyun,17 qələbə, 7 heç-heçə, 3 məğlubiyyət) 58 xal
Bu dövrəni komandanın mövsüm ərzindəki ən uğurlu hissəsi hesab etsək, yanılmarıq. Komanda ardıcıl böyükhesablı qələbələr seriyası sayəsində liderlik kreslosundakı mövqeyini bir qədər də möhkəmlətdi. Düzdür, mövsümün ikinci yarısı “Xəzər Lənkəran”a məğlubiyyətlə başlasa da, qısa zamanda toparlanmaq mümkün oldu.
IV dövrə
Dövrəyə əsasən komandanın göstərdiyi nəticələr.
“Qarabağ” (8 oyun*, 4 qələbə, 2 heç-heçə, 3 məğlubiyyət)
Ümumi nəticəyə əsasən komandanın mövqeyi.
1. “Qarabağ” (36 oyun, 21 qələbə, 9 heç-heçə, 6 məğlubiyyət) 72 xal
Finiş turuna “Qarabağ” yenə böyük sürətlə daxil olsa da, sonradan “əyləcə basmaq” məcburiyyətində qaldı ki, bunun da nəticəsində çempionun kim olacağı ilə bağlı suallar doğmağa başladı. Axı “Bakı” və “Neftçi” ilə heç-heçə, həmçinin “Simurq”a məğlubiyyət sayəsində bir göz qırpımında 13 xallıq fərq 6-ya endi. Amma sonradan “İnter”lə maçdakı parlaq qələbə sayəsində möcüzəyə imkan verilmədi. Ağdamlıların gənclərlə çıxdığı “Sumqayıt” və “Xəzər Lənkəran” maçlarındakı uğursuzluğu hardasa başadüşülən idi. Komanda çempionluq yolundakı ən böyük rəqibi “İnter”i mövsümün bütün maçlarında məğlub etməyi bacardı (1:2,0:2,0:3,1:4). Maraq üçün qeyd edim ki, bu mövsüm Ağdam klubu yalnız “Simurq”u məğlub edə bilmədi.
Ümumi mənzərə
Heç kimdə şübhə doğurmur ki, Azərbaycan klubları arasında ən güclü yarımmüdafiə xəttinə məhz “Qarabağ” malikdir. Riçard Almeyda, Reynaldo və Çumbinyo öz mövqeyinə görə ölkəmizin ən yaxşılarıdır. Bumövsümkü uğurlarda da bu “üçlüynün” əməyi danılmazdır. Qapı və müdafiə xətləri də qənaətbəxş olsa da, hücum xətti haqqında eyni sözləri demək mümkün deyil. Qurban bəyin ulduzu Nikolas Gelaşvili hələ ki, сıiddi nəyləsə yadda qalmayıb. Hücum xətti bir qədər də gücləndirilsə, Avropada da uğura ümid etmək olar.
* 27-ci turdakı “Sumqayıt”la görüş (3:0) III dövrəyə aid edildiyindən, oxucularımız arasında hər hansı qarışıqlıq yaranmasın deyə, IV dövrədə 9 yox 8 oyun nəzərə aldıq.
Ürfan Məmmədzadə
