Mövsümün sonu yaxınlaşdıqda baş məşqçilər yollarını ayıracaqları futbolçuları da müəyyənləşdirir.
Korner.az-ın məlumatına görə, “İnter”ə rəhbərlik edən Kaxaber Tsxadadze qapını göstərəcəyi bəzi oyunçularla bağlı qərarını artıq verib.
Gürcü mütəxəssis qışda gələn iki legionerin – Dieqo Madriqal və İvo Taborskinin getməsini istəyir. Çünki bu futbolçular heç cür heyətdə özlərinə gələ bilmədilər. Debüt oyununda “Simurq”un qapısına yol tapan Dieqo sonradan özünü göstərə bilmədi və gününü əvəzedici komandada keçirir. Tsxadadze Kosta Rika yığmasının üzvünə əsas heyətdə cəmi 2 dəfə şans verib və 30 dəqiqə oynadıb. Taborskinin də vəziyyəti ondan fərqli deyil. Qışda “Mlada”dan transfer olunan yarımmüdafiəçiyə Kaxa əvəzedici gözü ilə baxır. Gürcü mütəxəssis onu 6 oyunda 110 dəqiqə oynadıb.
Yola salınacan digər legioner İvan Benitesdi. Tsxadadze ispan mərkəz müdafiəçisinə bu mözvüs 18 Premyer Liqa və kubok matçında şans verib. Baş məşqçi son dövrlər heyətə düşməkdə çətinlik çəkən Benitesi son iki turda məcburiyyətdən əsas heyətə daxil edib. Onunla mövsüm bitən kimi yollar ayrılacaq.
Yerli futbolçulara gəlincə, artıq 37 yaşı olan Elşən Poladov böyük ehtimalla mövsümün sonunda karyerasını bitirəcək. “İnter”də 3-cü qapıçı olan veteran futbolçu yəqin ki, komandada məşqçi kimi saxlanıcaq. Kaxa ona bu mövsüm 2 matçda oynamaq şansı verib. “Simurq”a əvvəlcədən planlaşdırılmış məğlubiyyətdə (1:2) və “Rəvan” üzərində 5:1 hesablı qələbədə qapını Poladov qoruyub.
Kaxanın etimad etmədiyi başqa bir futbolçu Elhad Nəziridi. “Petrolul”dan gəlib “Rəvan”la müqavilə bağlayan, amma bir neçə gün sonra “İnter”ə üz tutan müdafiəçi hələ bu komandanın əsas heyətində debüt etməyib. Gününü əvəzedici heyətdə keçirən millinin sabiq üzvü özünə yeni iş yeri axtarmalı olacaq.
Onunla yanaşı, Tsxdadadzenin güvənmədiyi Samir Zərgərovda komandanı tərk edəcək. Heç cür baş məşqçinin “gözünə girə bilməyən” yarımmüdafiəçi bu mövsüm Premyer Liqanın 2 oyununda 16, Avroliqanın 2 matçında 18 dəqiqə forma şansı qazanıb.
“İnter”i tərk edəcək digər futbolçuların adına mövsümün sonunda aydınlıq gələcək. Tsxadadze istədiyi transferləri edə bilsə, Aleksandr İaşvili (36 yaş) və Slavko Georgievski (34 yaş) ilə də vidalaşmaq istəyir.
