“Simurq” Premyer Liqada 200-cü oyununu keçirib.
Korner.az-ın məlumatına görə, ölkə çempionatının XXVIII turunda “Bakı”nın qonağı olan Zaqatala təmsilçisi 2006-cı ildən çıxış etdiyi güclülər dəstəsində yubiley matçına çıxıb. Paytaxt təmsilçisinə 2:1 hesabı ilə uduzan “Simurq” elitadakı 7 mövsümdə bu oyunadək 199 görüş keçirmişdi.
200-cü qol
200-cü oyununu keçirən “Simurq” yubiley oyununda yubiley qolunu da vurdu. “Bakı” ilə matçdakı təsəlli qolu klubun Premyer Liqada 200-cü qolu oldu. Bu topu meydan sahiblərinin qapısından polşalı legioner Marçin Burxardt keçirdi.
Klubun Premyer Liqadakı 200 qolunun müəllifləri arasında ən yaxşı bombardir Vladimir Mazyardı – 28 qol. Daha 3 futbolçu 10-dan çox qol vurub: Elşən Məmmədov – 13, David Bolkvadze – 12, Ramin Nəsibov – 11.
