Millimizin və Rumıniyanın «Petrolul» klubunun üzvü Elhad Nəziri rumın jurnalist Kristian Anqeleskunun suallırını cavablandırıb. Müsahibəni qısa ixtisarlarla təqdim edirik.
– Elhad, yəqin ki, son günlər mətbuatda haqqında yazılanlardan xəbərdarsan. Yaşını saxtalaşdırıldığına dair xəbərlərə münasibətin necədi?
– Öncə onu deməliyəm ki, bunlar hamısı cəfəngiyyatdı.
– Belə xəbərlər yayılmasının səbəbi nədi?
– Sadəcə, Azərbaycanda hərdən kimsə, hansısa uğura imza atanda, bəzilərinin bunu gözü götürmür. Ona görə də bu cür qara yaxmağa çalışırlar. Vaxtilə məni Azərbaycan yığmasına çağıranda sənədlərimi, hər şeyi yoxladılar. Nəsə düz olmasaydı, yaxına buraxmazdılar. Amma indi kimlərsə yazır ki, 23 yaşım var, mənim futboldan xəbərim yoxdu, ancaq çimərlik futbolunda çıxış etmişəm, və s.
– Bəs elə isə niyə bütün bunlar baş verir?
– Azərbaycanda, Bakıda elə jurnalistlər var ki, futbolu hörmətdən salmaq, futbolçuları qaralamaq üçün əlllərindən gələn hər şeyi edirlər. Yəqin ki, mən «Petrolul»a transfer olunmasaydım, heç kimin yadına da düşməyəcəkdim. Bilirəm ki, çoxları mənim bu kluba keçidimi istəmirdi.
– Bu xəbərlərin yayılmasının bir səbəbi də sənin «Facebook» səhifəndə soyadının Əhmədov, doğum tarixinin isə 1990-cı il gömtərilməsidi…
– Mənim «Facebook»da cəmi bir səhifəm var. Digər səhifələrin isə mənə aiddiyyatı yoxdu. Onları kənar adamlar yaradıblar. Öz səhifəmdə də yalnız dostlarım, ailə üzvlərim, yaxınlarımdı.
– Bəs «Petrolul»un azarkeşləri sənə dostluq göndərmək istəsələr, onda necə edəcəksən?
– Tezliklə tərəfdarlar üçün də bir səhifə açacağam və kimə nə maraqlıdısa, orda cavab verəcəm. Amma şəxsi səhifəm ancaq ailəm üçündü.
– «Petrolul»a gəlişin necə oldu?
– Mən «Milsami»nin heyətində Antalyada toplanışda olarkən çıxışımı izləyirdilər. Orda bir sıra oyunlarımız da oldu. Məhz həmin sınaq matçlarından sonra belə bir təklif olduğunu bildirdilər. Nəticədə də mən bu kluba keçdim. Bu, karyeramda çox önəmli bir addım idi.
– «Petrolul»da debüt etməyə hazırsan?
– Çox ümid edirəm ki, tezliklə belə bir şans qazanacağam. 21 yaşım var və məni uğurlu karyeradan başqa heç nə düşündürmür.
