“Baş məşqçimiz haqlıdı” – Donald Gerye
09.11.2019 , 23:04
“Neftçi”nin futbolçusu Donald Gerye Azərbaycan Premyer Liqasının XI turunda səfərdə “Keşlə”yə 1:2 hesabıyla uduzduqları matçdan sonra jurnalistlərin suallarını cavablandırıb.
Futbolçu məğlubiyyəti belə şərh edib:
– Bu nəticəni gözləmirdik. Görüşə ciddi hazırlaşmışdıq. Meydana yaxşı nəticə üçün çıxmışdıq və buna nail olmağa sona qədər mübarizə apardıq. Artıq bu oyunu unutmalı və qarşıdakı matçlara hazırlaşmalıyıq.
– Bu məğlubiyyəti çempionluq yarışında “Neftçi” üçün böyük zərbə hesab etmək olar?
– Bundan sonra daha çox çalışmalıyıq. Çempionluq mübarizəsinə gəlincə, hələ ümidimiz var. Çünki qarşıda çox oyun olacaq. Mübarizəni davam etdiririk.
– Baş məşqçiniz Roberto Bordin mətbuat konfransında futbolçuların istənilən səviyyədə çıxış etmədiyini söyləyib. Onun fikirlərinə münasibətinizi bilmək maraqlı olardı…
– Baş məşqçimiz haqlıdı. Bu gün daha yaxşı oynaya bilərdik. Meydanda yetərincə vuruşmadıq və buna görə uduzduq. Növbəti oyunları daha yüksək səviyyədə keçirməliyik.
– Kənardan elə görünür ki, sanki “Neftçi”də xoşbəxt deyilsən…
– Unutmayın ki, “Neftçi” mənim üçün yeni komandadı. Hələ tam uyğunlaşa bilməmişəm. “Qarabağ”da futbolçularla bir-birimizi yaxşı başa düşürdük. “Neftçi”də isə yeniyəm. Düşünürəm ki, getdikcə hər şey daha yaxşı olacaq.
– Səncə, “Qarabağ”da oynamaq asandı, yoxsa “Neftçi”də?
– Çətin sualdı. Ancaq mənə “Qarabağ”da oynamaq daha rahat idi. Çünki bayaq da dediyim kimi, futbolçularla yaxşı anlaşırdıq. Məsələn, top Rəşad Sadıqovda olanda irəli çıxırdım, Riçard Almeyda mənim mövqeyimə düşürdü, Abdulla Zubir cərimə meydançasına daxil olurdu. “Neftçi”də isə vəziyyət hələ ki, fərqlidi. Mənim üçün burada hər şey yenidi. Bu barədə əlavə nəsə deyə bilmərəm.
