Ümumdünya Boks Seriyası (WSB) IX turdan sonra yeni fərdi reytinq cədvəlini açıqlayıb.
Korner.az-ın məlumatına görə, “Baku Fires” klubunun iki üzvü reytinqdə 1-ci yeri tutur.
56 kq çəki dərəcəsində mübarizə aparan Məhəmməd Qurbanov 4 görüşdən sonra 20 xal toplayaraq siyahıya başçılıq edir. Onun ən yaxın izləyiciləri amerikalı Fransisko Martinez və irlandiyalı Maykl Konlandı.
Albert Səlimov da fərdi reytinqdə 1-ci yeri tutur. 4 görüşdən sonra aktivində 20 xalı olan boksçumuz kubalı Lazaro Estrada (18 xal) və rusiyalı Adlan Abduraşidovu (15 xal) qabaqlayır.
Heybətulla Hacəliyev (64 kq) Venesuela boksçusu üzərində qələbədən sonra 2-ci pilləyə yüksəlib. Milli komandamızın üzvü 5 döyüşdən sonra 20 xal toplayıb. İtaliya nümayəndəsi Vinçenzo Maniaqapre eyni göstəriciyə malik olsa da, o, 1-cı sıradadı. Meksikalı Raul Qarsiya 18 xalla 3-cüdü.
69 kq çəki dərəcəsində yarışan Pərviz Bağırov reytinqdə 4-cü yerdədi. Bu çəkidə Rəcəb Butayev (Rusiya) liderdi. Mərakeşli Məhəmməd Rabii və irlandiyalı Stiver Donelli 2-3-ci yerləri tuturlar. Amma Bağırov digər rəqiblərinə nisbətən 1 görüş az keçirib.
Soltan Migitinov 81 kq çəki dərəcəsində reytinqdə 5-ci sıradadı. O, kubalı Julio La Kruz Pereza, italiyalı Valentino Manfredonia, xorvatiyalı Hrvoje Sep və rusiyalı Pavel Silyagindən geri qalır.
“Caciques Venezuela” klubu ilə qarşılaşmada nokautla növbəti qələbəsini qazanan Abdulqadir Abdullayev (91 kq) hələ ki fərdi reytinqdə 4-cü yeri tutur. “Baku Fires” klubunun üzvü 4 görüşdən sonra 20 xal toplayıb. Qazaxıstan boksçusu Vasili Levit bu çəkidə liderdi. Kuba təmsilçisi Erislandi Savon 2-ci, polşalı İqor Yakubovski isə 3-cü yeri tutur. Abdullayev liderdən 3 xal geri qalır.
Superağır çəki dərəcəsində Arslanbek Mahmudov 19 xalla 3-cü pillədədi. Siyahıya 20 xalı olan Filip Hrqoviç başçılıq edir. Böyük Britaniya təmsilçisi Cozef Coys 2-ci yerdədi.
Qeyd edək ki, 49, 91 və +91 kq çəki dərəcələrində reytinqdə 1-ci olacaq boksçular, digər çəkilərdə isə 1-2-ci yerləri tutacaq idmançılar Rio-de-Janeyro Olimpiadasına vəsiqə qazanacaqlar.
