Avstriyada təlim-məşq toplanışda olan “Simurq” hazırlıqlarını davam etdirir. Korner.az klubun rəsmi internet saytına istinadən xəbər verir ki, gündə iki dəfə olmaqla məşq edən Georgi Çixradzenin yetirmələri dünən əsasən taktiki çalışmalar üzərində işləyib.
Toplanışın 3-cü günündə “sarı-qaralar”ın heyətinə baxış üçün dəvət edilmiş yeni futbolçularda qoşulub. Bunlar yarımmüdafiəçilər – slovakiyalı Branislav Fodrek və polşalı Burkxard Marçindir. Bu oyunçulardan əvvəl isə Miroslav Antonov, Daniel Peyev, Dilaver Zirnanoviç, Stjepan Poljak, Milan Andelkoviç və Darko Brljak "Simurq"un düşərgəsinə təşrif buyurub. Hazırda komandada baxışda olan legioner futbolçuların sayı səkkiz nəfərə çatıb. Onlar haqqında son qərar yoldaşlıq görüşlərindən sonra məşqçilər korpusu tərəfindən veriləcək.
Qeyd edək ki, "Simurq" sabah Avstriyada ilk yoldaşlıq görüşünə çıxacaq. "Əl-Əhli" komandası ilə keçiriləcək yoxlama matçı Bakı vaxtı ilə saat 19:00-da başlayacaq.