“7 rəngli topum”
10.02.2012 , 19:28
Azərbaycan nağılları hər zaman maraq cəlb edən janr növü olub. Mən də nağılların həvəskarı, oxucusu olmuşam. Lakin yadıma salmaqda çətinlik çəkdiyim nağıllardan biri bu günlərdə yadıma düşdü. “7 rəngli topum” nağılını mən “Bakı” – “Qəbələ” oyununun simasında xatırlaya bildim.
Premyer Liqada hakimlik səviyyəsi yenə özünü bariz büruzə verdi. 14-cü turun maraqlı oyunlarından birində hakim səhvi gözdən qaçmadı. “Bakı”nın bazasında keçirilən oyunda hakim səhvi göz çıxartdı.
Paytaxt klubunun futbolçusu Deividas Çesnauskisin qol vurub fərqləndiyi epizodda top xəttini daha sonra isə toru cırıb keçdi. Maraqlıdır yan xətt hakimləri qapı toruna baxış keçirib “cırıq” olub-olmadığını yoxlamamışdırlar ki… Yaxşı yoxlanmışdısa, bu nə idi. Matçın yan xətt hakimləri Azər Əsgərov və Namiq Hüseynov bu boyda “cırığı” görmədilərmi? Yəni iki hissəli bir oyunda bunu bir hakim yoxlayıb görməyib, bəs ikincisi nədən buna məhəl verməyib.
Bu da hakimlər komitəsinin rəhbəri Xaqani Məmmədovun bəh-bəhlə təriflədiyi hakimlər. İndi gəl bunların səhvinə bir “don” geyindir. Elçin Məmmədovun rəhbərliyi altında meydana çıxan laynsmanların bu səhvini bağışlamaq olarmı? Bəyəm Elçin Məmmədovun rəhbərlik etdiyi hakimlər briqadası bu boyda cırığı görməyib. Ya görməyib, ya da görüb görməməzliyə vurub.
Bəli, fikirləşə bilərsiniz ki, zərbə çox qüvvətli olubda ondan qapı torunu “dərmə-deşik” edib keçib. Lakin zərbə də zərbə olsa… Futbolçu zərbə deyil, sanki ötürmə edir və top qapı xəttini , arxasınca da qapı torunu keçib gedir.
Deyirəm yaxşı ki, reklam bannerləri var idi, yoxsa bəlkə də top haralara gedərdi. Lap Azərbaycanın məşhur və sevilən nağılı “7 rəngli topum”a bənzədi. Top gedir lakin oğlan hələ də onu tuta bilmir.
P.S. “Hakimləri qınamaq” da olmur. Qar stadionun bir qırağına elə yağıb ki, “yazıq” hakim onu necə görsün? Top ağ, tor ağ…
