Ötən gün Topaz Premyer Liqasının 2013/14 mövsümünə start verilib. “Bakı” və “Qəbələ” arasında baş tutan açılış matçında 5 legioner futbolçu Azərbaycan çempionatında debüt edib.
Bunlardan 2-si paytaxt klubunun heyətində, digər 3-ü isə “qırmızı-qaralar”ın tərkibində meydana çıxıb.
Belə ki, ötən mövsüm “Mura”da forma geyinən “zolaqlılar”ın sloveniyalı müdafiəçisi Yure Travnerə və yunanıstanlı Georgios Pelagiasa baş məşqçi Milinko Pantiç ilk “11-lik”də şans verib. Hər iki arxa xətt oyunçusu matçı sonadək davam etdirib.
“Qəbələ”də isə hollandiyalı yarımmüdafiəçi Lorenzo Ebesilio və braziliyalı Leonardo da Silvan start heyətində meydana çıxdığı təqdirdə, rusiyalı baş məşqçi Yuri Syomin Abdulvahid Afolabini 46-cı dəqiqədə Yannik Kamananın yerinə meydana daxil edib. Lakin Ebesilio 90 dəqiqə oynasa da, Da Silva 88-ci dəqiqədə Deyan Kelharla əvəzlənib.
Qeyd edək ki, “Qəbələ” ilk hissədə minimal hesabı ilə uduzurdu. İkinci yarıda isə oyuna sonradan daxil olan Viktor Mendi dubl edərək, komandasına 3 xal qazandırıb.
