1-liqadan 3 komanda Premyer Liqaya
19.02.2025 , 18:30
2025/26 mövsümündə 1-ci liqadan 3 komanda Azərbaycan Premyer Liqasına yüksələcək.
Korner.az xəbər verir ki, bu barədə AFFA İcraiyyə Komitəsinin bugün keçirilən iclasında çıxarılan qərarda bildirilib.
İclasda Azərbaycan Premyer Liqasında 2025/2026-cı illər mövsümünün formatı müzakirə edilib. Qərara alınıb ki, növbəti mövsüm 12 komandanın iştirakı ilə 3 dövrədən (33 turdan) ibarət olsun. III dövrənin oyunlarında meydan sahibi olacaq komandalar püşk əsasında müəyyənləşdiriləcək.
Cari mövsüm Əsasnaməyə uyğun olaraq, sonuncu yeri tutan komanda Premyer Liqanı tərk edəcək, əvəzində I Liqadan 3 komanda birbaşa yüksək dəstəyə vəsiqə qazanacaq.
İcraiyyə Komitəsində qərara alınıb ki, 2025/2026-cı illər mövsümündə isə Premyer Liqada sonuncu yeri tutan klub I Liqaya düşsün, I Liqanın qalibi isə birbaşa yüksək dəstəyə vəsiqə qazansın. Premyer Liqada 11-ci yeri və I Liqada 2-ci yeri tutan komandalar arasında neytral meydanda bir oyundan ibarət pley-off görüşü keçiriləcək.
Qalib komanda Premyer Liqada iştirak hüququ əldə edəcək.
