Bu gün “Qarabağ”ın azarkeş dəstəyi olan İmarət Azad Azarkeş Qrupunun təşkil etdiyi “2013-cü ilin yekununa həsr olunmuş” mərasimdən sonra komandanın icraçı direktoru Əmrah Çəlikəl jurnalistlərə müsahibə verib.
Korner.az-ın məlumatına görə, klub direktoru İmarətin Azad Azarkeş Qrupunun təşkil etdiyi mərasim haqqında, “Qarabağ”ın 2013-cü ildəki çıxışından və “Qarabağ”ın gələcək planlarından bəhs edib:
Mərasim haqqında fikirlərinizi bilmək istərdik…
“Ümumilikdə maraqlı tədbir izlədik. Fəxr elədik ki, “Qarabağ”ın belə azarkeş qrupu var. “İmarət” həmişə, yarandığı gündən fərqli olub. Bu gündə biz o fərqliliyi hiss elədiyimizə görə, sevinirik”.
“Qarabağ”ın fasiləyə “Qış çempion”u kimi yollanacağını gözləyirdinizmi ?
“Əlbəttə gözləyirdim. Hətta xal fərqinin daha çox olmasını gözləyirdim. Lakin əsas məqsəd çempiotanın sonunda çempion olmaqdır. Qış çempionluğu da üstümüzdəki məsuliyyəti daha da artırır ki, biz bu yerimizi qoruyaq”.
Bəs komandanızın ilk dövrədəki oyunundan razı qaldınızmı ?
“Əlbəttə razı qaldım. Komanda ilk dövrəni lider başa vurub necə razı qalmayım? Tam razıyam komandamdan”.
Artıq uzun müddətdir azarkeşlər həsrətləri olan çempionluğu gözləyir. İllərdən gözlədikləri çempionluğu onlara bəxş edə biləcəksinizmi?
“Çempionluq bütün klubların arzusu və istəyidir. Bu gün heç bir klub mən ikinci və ya üçüncü yer olacam demir. Biz də çempion olmaq istəyirik. Ən az azarkeşlərimiz qədər uzun müddətdir əldə edə bilmədiyimiz çemionluğu bu il əldə etmək istəyirik. Əsas odur ki, biz çempion olmaq üçün əlimizdən gələn hər şeyi edirik. Baş məşqçimiz də, prezidentimiz də, elə azarkeşlərimiz də. Bunun nəticəsi olaraq da çempionluğu əldə etmək istəyirik. Azarkeşlərimizi də başa düşürük. Lakin onlar da bilməlidirlər ki, biz bunu daha çox istəyirik“.
Çempionluq uğrunda əsas rəqibləriniz kimlər olacaq ?
“Bu gün turnir cədvəlinə nəzər yetirdikdə ilk üç pillədəki komandalar arasında xal fərqi 1 və ya 2 xaldır. Bu çempionatın maraqlı keçdiyindən və səviyyəsindən xəbər verir. Çox şey dəyişə bilər. Yəni görürük ki, lider komanda 1 həftə sonra 3-cü pilləyə düşür. Əlbəttə ilk dövrəni lider bitirdik. Lakin zirvəni qorumaq çox çətin olacaq. Mən deməzdim 1 və ya 2 komanda ilə oyunumuz çətin keçəcək, deyərdim ki, 10 komandanın 10-nu ilə də oyunlarımız çox çətin olacaq”.
Komanda qış fasiləsində heyətini daha da gücləndirəcəkmi?
“Bu Qurban Qurbanova aid bir sualdır. Əlbəttə ki, istədiyi təqdirdə komandası daha da güclənəcək. Bizim işimiz isə onun istədiyi şəraiti ona yaratmaq və ona kömək etməkdir”.
Tədbirdəki azarkeşlərin çox və veteranlar Ağdamda oyun keçirməyinizi istədilər. Heç olmasa çempionatın hansısa 1 turunu Ağdamda keçirməyi planlaşdırırsınızmı?
“Bu bizdən asılı deyil. Bu yalnız PFL-dən asılıdır. Bilirsiniz ki, bizim öz baza və stadion tikintimiz mövsümün sonlarında başa çatacaq. Lakin Ağdamda da oyun keçirmək istəyirik. amma bu sualın cavabını PFL rəhbərliyində axtarsanız yaxşı olar”.
