“Əgər getməliyəmsə, 5 illik sözləşmə olsa da, gedəcəm” – Rəşad Sadıqov
06.05.2023 , 23:33
Premyer Liqanın 33-cü turunda keçirilən “Şamaxı” – “Zirə” oyunundan sonra qonaq komandanın baş məşqçisi Rəşad Sadıqovun mətbuat konfransı keçirilib.
Korner.az xəbər verir ki, o, qələbəni belə şərh edib:
“Nəticə və oyun bizi sevindirir. Futbolçulardan razı qadım. İlk dəqiqələrdə həyəcan var idi. Dəqiqələr keçdikcə oyun tam nəzarətimizdə oldu. Çox önəmli qələbə qazandıq. Əvvəlki oyunlarla müqayisədə uşaq səhvlərinə yol vermədik. Buna görə də nəticə yaxşı oldu. Şamaxı və Qəbələdə nəfəs almaq çətindir. Bu gün komandanın verdiyi reaksiya məni razı saldı. Çətin səfərdə qələbə qazandıq.
Təbii ki, hazırda “Qəbələ” daha şanslıdır. Bu, “Turan Tovuz”la oyuna kimi də belə idi. Amma son məğlubiyyət vəziyyətimizi çətinləşdirdi. Hər oyunda məsuliyyətli olmalıyıq. Problemləri bilirik. Onları aradan qaldırdıqdan sonra müsbət nəticələr əldə edə bilərik.
Bütün fikrimizi qarşıdakı oyunlara yönləndirmişik. Paralel olaraq da futbolçuları gözdən keçiririk. Amma konkret olaraq kimin gedəcəyi, kimin gələcəyi dəqiq deyil. Həftəiçi rəhbərliklə görüşümüz oldu. Müqavilənin uzadılmağı ilə bağlı yanvarda görüş keçirmişdik. Həmin vaxt özüm istəmişdim ki, bunu yayda danışaq. İndi belə qərar qəbul etdik ki, əməkdaşlığımıza davam edək və daha da keyfiyyətli komanda formalaşdıraq. Mən də istəyirəm ki, Konfrans Liqasına gedək. Bu il Konfrans Liqası şansını kubokun 1/4 finalında əldən vermişdik. Gələn il daha güclü “Zirə” olması üçün əlimizdən gələni edəcəyik. Müddəti danışmadıq. Bizim münasibətimiz elədir ki, müqavilə formal bir şeydir. Əgər getməliyəmsə, 5 illik sözləşmə osla da, gedəcəm.
Klubun infrastrukturuna gəlincə, ilk gəldiyim gündən bu barədə müzakirələrimiz gedir. Rəhbərlik də istəyir. Amma Bakı komandası üçün çətindir. Yer tapmaq və s… Bugünkü şəraitimiz də pis deyil. Bu, səbəb deyil. “Qəbələ” ilə aşağı-yuxarı eyni şəraitdə hazırlaşırıq. Onlar da Bakıda məşq edirlər. Həlledici məqam kobud səhvlərdən buraxdığımız qollar və dəyərləndirmədiyimiz epizodlardır. Səhv yolda olduğumuzu düşünmürəm. Bu oyunumuzu bir az da artırsaq, nəticələr də yaxşı olacaq. Bizdə oyuna baxmırlar. Oyun bitən kimi tabloya baxırlar. Bu gün futbol camiəmiz belədir. Çox şeylərə fikir verməməyə çalışıram. Ən böyük tənqidçim özüməm. Hər şeyi götür-qoy edirəm”.
