"Transfer etmək fikrindəyik" - Qurban Qurbanov

"Transfer etmək fikrindəyik" - Qurban Qurbanov

806 Oxunma

Qarabağ” Çempionlar Liqasının II təsnifat mərhələsinin cavab oyununda Gürcüstan “Samtredia”sına qalib gəldi – 1:0. İki oyunun nəticəsinə görə 6:0 üstün olan Ağdam klubu növbəti mərhələyə adlayan tərəf oldu.


Oyundan sonra keçirilən mətbuat konfransında “Qarabağ”ın baş məşqçisi Qurban Qurbanov jurnalistlərin suallarını cavablandırdı. Təcrübəli mütəxəssis öncə matç barədə fikirlərini bildirdi:


“Əvvəldən ağır oyun olacağını bilirdik. Baxmayaraq ki, 5:0 qalib gəlmişdik, “Samtredia” təslim olmaq istəmirdi. Yenə də bunun şahidi olduq. Hava həddən artıq isti idi. Bu baxımdan komanda üçün oynamaq çətin oldu. Oyun keyfiyyətlərini görməsəm də, oyunçuların disiplinindən razı qaldım. Düzgün müdafiə olunmağa çalışırdılar. Bir qədər top itkilərimiz çox oldu. Amma hər birindən razı qaldım. Nəticə üçün maksimumunu etdilər. Rəqib komandanın oyunçularına da təşəkkür düşür ki, ilk oyundakı böyük hesablı məğlubiyyətdən sonra xarakter, istək göstərdilər. Məncə, “Samtredia” yaxın zamanda  Gürcüstanın ən güclü komandalarından biri olacaq və uğurlarını görəcəyik”.


- Nikaraqua millisinin kapitanı Xuan Barreranın adı “Qarabağ”la hallanır. Bu məlumatlar nə dərəcə həqiqətə uyğundu?

- Biz qarşıda transfer etmək fikrindəyik. Bəzi oyunçularla danışıq gedir. Amma onunla bağlı hər hansı məlumatım yoxdu.


- Qeyd etdiz ki, “Samtredia”nın oyununu bəyəndiz. Hansısa oyunçusunu xüsusi fərqləndirə bilərsizmi? Bir də “Samtredia”nın heyətində öz komandanızda görmək istəyəcəyiniz oyunçu oldumu?

- Həqiqətən də, oyun üslubunu bəyəndim. Çox da uzun müddət bir yerdə oynayan kopllektiv deyillər. Buna görə də hələ ən yüksək formaya çatmayıblar.. Ancaq topla çox yaxşı davranırlar. Bu, yəqin ki, məşqçinin fəlsəfəsidi. Ancaq transfer siyahımızda bu komandadan kimsə yoxdu. Hansısa birini fərqləndirmək istəməzdim.


- “Kukesi”, yoxsa “Şerif”?

- Hansı layiqdisə, o da qələbə qazansın. Biz sadəcə rəqibimizi gözləyirik.


- Bu gün öyrəşdiyimiz “Qarabağ”ı meydanda görmədik. Bu, komandanın tam hazır olmamasıyla bağlıdı, yoxsa başqa səbəblər var?

- Zəif oyunlarımız az olmayıb. Futbol elə bir oyundu ki, daima məğlub ola da bilərik, özümüzdən zəifinə uduza da bilərik. Qələbələrimizi isə çox da böyütmək istəmirəm. Hələlik kiçik addımlar atırıq. Klub, komanda olaraq, çatışmazlıqlarımız çoxdu. Hər il pillə-pillə itrəliləməyə çalışırıq. Bu gün ola bilsin ki, ilk oyundakı nəticənin də müəyyən qədər təsiri oldu. Dünən də demişdim ki, rəqib nə qədər imkan versə, o qədər hücum edəcəyik. Məncə, bu, müəyyən qədər alındı. İndiki məqamda futbolçulardan ən yaxşı oyunu tələb edə bilmərəm. Onların bir-birinə uyğunlaşması, yüksək forma yığması üçün hələ vaxt lazımdı. (futbolpress.az)



Köşə yazıları